Page 9 - HOSPITAAL

Participacion di hobennan den HCCA tabata hopi bon

Wednesday, 07 June 2017 13:26
Comparti

Den fin di siman a tuma luga e Health Care Conference Aruba cu participacion di oradornan local y
internacional for di Ministerio di Salud y otro organisacionnan. Durante e conferencia di HCCA tabata
presente consehero di Ministerio di Salud Publico, Cuido di Nos Grandinan y Deporte, Drs. Kristel
Browne. El a haya oportunidad di conta studiantenan cu tabata presente, su experiencia ora cu a caba di
studia na Aruba y despues sigui na Hulanda.

E tabata contento di a haya e oportunidad aki pa papia cu e hubentud y curasha nan pa sigui y no stop.
Drs. Kristel Browne a bay Hulanda pe studia gezondheidswetenschappen y e tabata cla cu su estudio aki,
el a bay Groningen unda el a studia “voeding in de etentiek” y a traha 5 aña na Hulanda como dietista.
“Despues di 5 aña mi tabata pensando cu a bira tempo pa mi bay bek Aruba, pasobra mi tin asina hopi
conocemento y mi ta sinti cu a bira e momento pa mi comparti mi conocemento cu e pueblo di Aruba”,
Drs. Kristel Browne a expresa. Ora cu el a bin Aruba na 2014, a tum’e basta tempo pe por a haya un
trabou den su richting pero esey no tabata un motibo pe keda cas por nada. El a traha varios trabou pero
cualkier trabou cu el a haci, a dun’e extra conocemento como persona y el a desaroya su mes. Awor e tin
un tiki mas di mita aña ta trahando pe Ministerio di Salud Publico, Maneho di nos Grandinan y Deporte
y ta gusta su trabou. “Mi ta haci’e cu amor, mi ta siñando masha hopi tambe. Kico ami lo kier duna
eigenlijk of comparti cu hendenan jong cu a bay afo y bin bek, ta hopi importante pa nan tene na cuenta
cu no ta tur ora bo ta bay haya e trabou direct, pero bo ta haya e trabou cu bo ta kere”, Drs. Kristel
Browne a expresa. Esaki no mester ta algo pa laga nan rindi pero ta importante pa nan tin suficiente
perseverancia y motivacion pa yega un caminda.

Drs. Kristel Browne ta un persona bastante motiva y a pasa laga su curriculum vitae tur caminda na
varios luga. Na final el a logra y awo ta traha como “Beleids Medewerker”. E tabata orador den e HCCA
pe parti di hubentud y nan parti tabata pa motiva e hubentud cu den e sector di salud tin asina hopi mas
opcion, pasobra no ta pasobra nan a studia den un tereno nan mester keda eyden so. Tin diferente otro
escogencianan cu nan por haci pa asina amplia e conocemento, lo amplia experiencia. Nan a mustra e
hubentud cu tin hopi mas cos eyfo y e sector di salud ta uno masha interesante. Nan tabatin un resultado
bon cu e participacion di EPI, De Schakel, Xavier University y tambe Colegio Arubano. Drs. Kristel
Browne a ricibi e feedback cu e studiantenan a haya e conferencia hopi interesante y e studiantenan a
haya 4 pregunta cu tabata un reto y nan mester a splica con nan lo trata e casonan si nan tabata den
salubridad.