Page 3 - HOH

2 LOCAL AWEMainta
Hemp no ta marihuana
Ta tempo pa brasa productonan di hemp
CU Aruba, den cierto sentidonan, ainda tin un mente cera
tocante uzo di marihuana ta parti di nos realidad demo-
cratico—tur hende tin derecho riba nan opinion. Pero e resis-
tencia directo y e boycottnan informal contra productonan
deriva di hemp ta algo completamente diferente. Esaki no ta
trata djis di punto di bista moral; e ta trata di mal compron-
demento, oportunidadnan perdi, y frenamento di progreso.
Prome, laga nos aclaria un confusion comun: Hemp no ta
marijuana. Aunke nan ta bin di e mesun famia di mata di
canabis, hemp ta contene solamente un cantidad minimo
di THC—e componente responsabel pa e efectonan psico-
activo di marihuana. Bo no por bira ‘high’ di hemp. Loke
hemp si ta ofrece ta un gama amplio di uzo practico: Textil,
papel, plasticnan biodegradabel, material di construccion,
productonan di cuminda rico na proteina y vet saludabel, y
hasta biofuel ecologico.
Globalmente, hemp ta experenciando un renacemento.
Paisnan for di Canada te na Australia ta brasando e como
un cultivo sostenibel cu ta apoya agricultor, ta crea trabou, y
ta reduci impacto riba medio ambiente. Hemp ta crece lihe,
ta rekeri menos awa cu catuna, y por wordo cultiva sin uzo
pisa di pesticida. Den un era unda sostenibilidad no ta un
opcion mas, e ta un di e recursonan mas versatil y amigo di
planeta cu tin disponibel.
Productonan di hemp cu Aruba por uza
Si Aruba brasa hemp, aki tin algun di e productonan cu real-
isticamente nos por produci, bende, of uza localmente:
• Textil di hemp – paña, tas, y tapijt duradero.
• Hempcrete – un material di construccion ecologico pa cas
y hotel.
• Plasticnan biodegradabel – pakete pa cuminda y tienda cu
ta reduci desperdicio.
• Productonan di papel – for di articulonan di oficina te na
papel di w.c., cu hopi menos impacto ambiental cu pulpa di
palo.
• Azeta di simia di hemp – pa cushina y como ingrediente pa
cuido di cuero.
• Productonan di bienestar cu CBD – azeta, inguente, y
suplemento cu calidad regula.
• Cuminda pa bestia – halto na proteina y sostenibel.
• Biofuel – reduciendo dependencia riba combustibel fosil
importa.
Esakinan no ta posibilidadnan abstracto—nan ta industri-
anan cu ta florece den otro pais, y nan ta alinea perfecta-
mente cu e metanan di Aruba pa sostenibilidad, innovacion,
Diamars, 12 Augustus 2025
y diversificacion economico.
Pero aki na Aruba, hopi biaha hemp ta keda gara den e red di
sentimento anti-marihuana. E resistencia cultural y politico
na canabis recreacional ta plama, y productonan di hemp
tin biaha ta wordo trata como si fuera nan ta peligroso of
ilicito. Esaki no solamente ta cientificamente incorecto—e
ta un bista cortico economicamente.
Algun hende lo argumenta cu permiti productonan di hemp
por ‘normalisa’ uzo di marihuana. Pero un rasonamento
asina ta cay den otro si bo analis’e bon. Ya caba nos ta
bende simia di amapola sin ta promove opio. Nos ta consumi
cafeina sin ta promove cocaina. E liña entre hemp y mari-
huana ta cla den ciencia y den ley—si nos scoge pa mark’e.
Un acercamento racional lo ta pa regula hemp manera
cualkier otro producto agricultural of industrial: Stipula
standard, duna productor licencia, sigura calidad, y cobra
belasting unda ta apropia. E acercamento aki lo no sola-
mente proteha siguridad publico, sino tambe habri un fuente
di entrada sostenibel pa e isla.
Aruba ta orguyoso di su innovacion y su capacidad di adapta.
Pero riba tema di hemp, nos ta keda atras—pega den un
mentalidad anticua cu ta trata tur producto relaciona cu
canabis como si fuera nan ta mescos. Ta tempo pa separa
hecho for di miedo. Hemp no ta un menasa pa nos cultura,
nos hubentud, of nos siguridad. Loke e ta, ta un oportun-
idad.
E escogencia ta simpel: Keda mara na percepcionnan robes,
of brasa un cultivo cu por fortalece nos economia, apoya nos
metanan di sostenibilidad, y demostra cu Aruba ta capaz di
balansa tradicion cu progreso. Hemp merece su luga den
nos futuro—y e combersacion mester cuminsa awo.