Page 3 - Awe Mainta 9 jan,2016

AWEMainta Diasabra, 9 Januari 2016 3

TRABOUNAN grandi ta tumando lugar na Plaza

Libertador Betico Croes, cu sigur no ta keda cla pa
celebra Dia di Betico dia 25 di januari awor. Esaki
ta haci cu Minister Otmar Oduber lo reuni cu e
famia, pa busca e mihor sitio pa conmemora fecha
natalicio di Betico Croes.

No ta exclui cu e ceremonianan lo por tuma lugar e
aña aki riba Plaza Status Aparte, cu ta keda dilanti
di cas di mayornan di Betico Croes na Santa Cruz.
Pa loke t’e trabaonan mes, Minister Oduber a
confirma cu trabounan di reconstruccion cu ta
tumando lugar lo tin hopi cambio grandi y cu lo tin
un costo total di 1.4 miyon pa drecha e plaza cu pa
hopi aña no a conoce un bon mantencion.
Minister Oduber a splica cu e plaza ta den un
condicion deplorabel caminda tin hopi trabou di
reconstruccion tin cu tuma lugar y loke ta nifica
cu lo bin cambionan grandi caminda e.o. e dak lo
wordo cambia y transforma den un construccion
mas adecuado y efectivo y tambe lo wordo amplia.

E plaza lo conoce un ampliacion di cierto
sector caminda lo transforma e plaza den un
centro cultural cu lo wordo uza henter aña pa
actividadnan cultural y cu lo ta bou supervision di
Cas di Cultura cu tambe lo haya un oportunidad pa
amplia su espacio pa brinda mas servicio cultural
pa comunidad.
Ta trahando duro pa Plaza Libertador Betico
Croes keda cla pa celebracion dia 18 di Maart y
lo promove actividadnan cultural henter aña y no
keda limita na solamente pa algun fecha durante di
henter aña.

E centro lo conoce cambio di camarinan, caminda
tin cierto sector cu a bay hopi atras pa falta di
mantencion y cu lo wordo drecha y amplia p’asina
brinda e servicio adecuado durante di actividadnan
cultural, mientras cu lo tin ampliacion di cierto
sector cu lo bay sirbi mas actividad cultural
durante di henter aña.
Minister Otmar Oduber a sigui splica cu ta
intencion den e maneho cultural cu Gobierno lo
kier mira, pa motiva mas actividad cultural den
pueblo y pa cual motibo lo transforma Plaza Betico
Croes den un centro adecuado p’esaki.

Pa hopi tempo e sitio no a conoce un mantencion
debido y awor ya caba trabounan a cuminsa pa
drecha y cambia varios cos n’e centro aki y duna
esaki e balor cultural cu e merece y tur esaki den
cuadro di celebracion di 30 aña di Aruba su Status
Aparte.
E proyecto aki ta uno hopi amplio y cu a bira
posibel cu participacion di Oficina di Turismo, TPF,
FDA cu pa medio di UNOCA hunto cu presupuesto
di Gobierno, ta financiando e cambionan riba Plaza
Betico Croes.
Tambe Minister Oduber a mustra cu e trabounan
aki ta tumando lugar na mes momento cu
trabounan ta tumando lugar riba Plaza Padu Lampe
caminda un biaha mas ta resalta e atencion cu tin
pa promocion y conservacion di Aruba su cultura.
E trabounan ta grandi riba Plaza Betico Croes cu lo
bay haya un aspecto totalmente diferente di loke e
tabata y ta te n’e momentonan aki.