Page 37 - MIN JUS 10 NOV 2015

Preso por poco a mata su mes den KIA

Publication: Tuesday, 10 November 2015. Categoria: General

ORANJESTAD (AAN): Hopi hende no ta imagina e presion cu un preso ta pasa aden ora e ta
sera den un cel den KIA. No solamente su consenshi ta traha riba dje, sino tambe problemanan
cu e lo por confronta cu otro presonan den KIA.

Esaki por conduci cu un preso por haya ataca di nervio of por bay asina leu cu e kier pone fin na
su bida. Aparentemente esey a sosode recientemente cu nu preso den KIA.

PRESO KIER MATA SU MES: Durante tratamento di un caso penal, un abogado a bisa Hues cu
su cliente por poco a mata su curpa den KIA.

E abogado a splica Hues cu su cliente a cont’e den KIA cu el a worde deteni door di Arestatie
Team dilanti di su yiunan y esaki a afect’e masha hopi mes. E nunca tabata kier pa su yiunan
mir’e den un situacion asina. Esaki a keda traha riba e sospechoso te cu na dado momento e kier
a mata su mes den KIA.

PRESO AFECTA MENTALMENTE: Un otro abogado, kende tambe ta representa e mesun
sospechoso pero pa un otro caso, a bisa Hues cu el a bay diferente biaha KIA pa papia cu su
cliente. El a constata cu e sospechoso ta hopi nervioso y cu e sospechoso a bisa e abogado cu e
no por atende cu e casonan.

E abogado ta haya cu Ministerio Publico no ta tene cuenta cu e situacion humano di un preso.
Enberdad e tin mas abogado pero e mes como persona mester atende cu e casonan y el a bisa cu
mentalmente e no por atende cu e casonan.

E abogado a bisa Hues cu e cliente a pidi’e pa pospone e caso. El a bisa Hues cu mester
considera esaki como un violacion di norma di banda di Ministerio Publico.

Fiscal a reacciona y a bisa cu e no ta haya cu ta violacion di norma. E ta haya cu a haci esaki
hustamente pa beneficia e sospechoso pa tur caso worde trata hunto.

Hues a bisa cu e ta bay pensa un rato riba e asunto aki y lo duna su decision.

Hues a bolbe y a bisa cu e ta dicidi cu na interes di e sospechoso lo ta mihor pa trata e caso
hunto. Pa loke ta peticion di pospone e caso, no tin motibo pa haci esaki pasobra Hues no ta haya
cu aki por papia di tin violacion di norma.

HUSTICIA MESTER PREVALECE: Ultimo tempo por constata cu mas y mas ta bin
discusionnan entre abogado y Fiscal den Corte riba e trato cu e preso ta ricibi ora cu e ta worde
interoga of cosnan cu ta pasa den KIA.

Hopi atencion ta worde poni riba e situacion humano di e preso y esaki ta di respeta. Sinembargo
ta parce cu ta lubida e punto cardinal.