Page 23 - AWEMAINTA
P. 23
Diamars, 5 December 2017 AWEMainta 23
Den su rol como mandatario encarga cu cultura:
Minister Xiomara Ruiz-Maduro a hasi
apertura di e Festival di Ranchera di Aduana
BANDA di su compromiso grandi pa locual ta su
responsabilidad como Minister encarga cu e carteranan di
Finanzas y Economia, diasabra anochi Minister Xiomara Ruiz-
Maduro, Aruba su Minister di Cultura, cu hopi placer a acepta
e invitacion pa efectua apertura di e Festival di Ranchera
organisa pa Cuerpo di Douane, cual departamento ta resorta
bou di e Ministerio di Finanzas, Economia y Cultura.
Como recuerdo, Director di Aduana, Roderick Lionel Croes,
a duna e mandatario un bunita medaya, cual na su turno a
aprecia y gradici pa e bunita gesto y ocasion.
Un Centro di Bario Noord bon concuri yen di animo a
presencia y disfruta di un bunita festival caminda tabata tin
participacion di 30 cantante.
Durante su discurso, Minister Ruiz-Maduro a expresa
palabranan di exito na tur participante cu a bin demostra nan
talento den canta e musica di ranchera y presenta den nan
trahe charo y china.
Ademas, e mandatario a felicita esnan encarga cu e organisacion
di e festival. Un pabien grandi na tur e ganadornan cu a bay cu
un premio. A resalta un biaha mas e carisma di e mandatario
cu durante e anochi a pasa saluda y combersa cu e publico
presente.
