Page 13 - RDA
P. 13
Manera ya ta konosí, skolnan situá den e area di Buenavista riba un base regular sa
eksperensiá molester di huma i holó prosedente di e operashon di e tereno industrial,
kaminda entre otro Refineria ISLA ta ubiká. E situashon sa ta asina grave, ku pa dianan
ripití tras di otro mester interumpí e operashon di skol, pa desalohá e edifisio, mirando ku
tantu alumno komo personal di skol ta eksperensiá malestar dor di e polushon. Den e
kuadro aki Minister di Enseñansa a kuminsá inventarisá opshonnan pa aliviá òf eliminá e
interupshon di e proseso di enseñansa na entre otro e skol VSBO Juan Pablo Duarte na
Buenavista.
Den e reunion aki, den kua Refineria Isla B.V. a keda representá dor di sr. R. van
Kwartel, sr. A. Matos de Leon i sr. H. Cornelia, a yega na palabrashon konkreto di kon ta
bai atendé ku e situashon na e skol spesífiko aki. Refineria Isla B.V. a komprometé di
duna nan kontribushon na VSBO Juan Pablo Duarte den forma di donashon di érko
resistente kontra polushon, pa asina personal i alumnonan por kontinua e proseso di
enseñasa sin interupshon. Tantu Ministerio di Enseñansa komo Refineria ISLA B.V. a
keda enkargá ku trabounan di preparashon, pa asina riba termino korto realisá e mihó
solushon, teniendo kuenta ku e petishon di personal di skol pa mantené e operashon di
skol na e mesun lokashon. Esaki ta un paso positivo mas pa kontribuí na bienestar di
personal di skol i en partikular nos alumnonan di skol VSBO Juan Pablo Duarte.
