Page 47 - KPA

Alumnonan di scolnan di Noord a cera conoci cu Bubali Plas

Wednesday, 07 June 2017 21:22
Comparti

Dia 5 di juni ultimo, riba Dia Internacional di Medio Ambiente, e grupo di Polisnan “N4-2013” a bishita e scolnan
basico den districto di Noord.
Pa finalisa nan trayecto di 4 aña na Scol di Polis, a scoge pa e proyecto di medio ambiente. E proyecto final ta “kico ta
menasa flora y fauna di Bubali Plas”.
A bishita Scol Basico Kudawecha, Santa Ana School, Scol Basico Washington, Felipe B. Tromp y Sint Aloysius
Basisschool.
Durante e investigacion riba Bubali Plas a bin realisa e efecto grandi cu entre otro azeta di cushina tin riba e planta di
purificacion di awa, esta e R.W.Z.I (Riool Water Zuiverings Installatie). E azeta di cushina aki por para full e proceso
di purificacion si e drenta e instalacion. Mirando e efectonan desastroso cu e azeta aki tin riba e planta y tambe e
medio ambiente, a dicidi pa conscientisa muchanan di scol basico den districto di Noord.
A haci presentacion na tur 5de klasnan y tambe na algun 6de klas. Durante e presentacion a splica kico Bubali Plas ta
y con importante e ta pa nos. Tambe a conta di tur e bestianan cu ta biba eyden y con e azeta di cushina ta afecta e
planta di purifica awa. Alabes a mustra nan riba e efectonan negativo cu e presencia di azeta den Bubali Plas tin riba
e bestianan cu ta biba eyden. Tambe a splica kico por haci cu e azeta di cushina uza.
E grupo di Polisnan di klas “N4-2013” ta masha contento cu e scolnan a ricibi nan cu man habri. Polis a keda hopi
satisfecho con e dia aki a bay mirando cu e muchanan y docentenan a mustra hopi interes den e proyecto. Ta sinti cu
a pone hopi atencion y e Polisnan ta sigur cu awor nan sa hopi mas di Bubali Plas. Ta convenci cu awor tur ta
consciente di e importancia di cuida nos bunita Bubali Plas y cu no mester tira azeta di cushina den riool ya cu esaki
ta afecta nos medio ambiente.
Pa finalisa e presentacion a hiba e klas di studiantenan pa mira con ta opera e planta. Nan a gosa masha hopi mes. E
Polisnan ta gradici cabesante di scol y e mayornan pa duna nan e oportunidad y confiansa pa por a hiba e alumnonan
na RWZI pa siña algo nobo.