Page 37 - MIN ECEM

Debi na crisis cu tin pa nos pais bisiña

“Sigur nos di Aviacion General ta masha contento di mira un cantidad asina grandi di
avioneta na Aruba. Sigur e no ta normal, pasobra normalmente ta bin 20 avioneta den un
fin di siman, pero e biaha aki, manera te cu ayera el a bira dobel plus”, asina Director di
General Aviation, Claudio Stamper a duna nos di conoce.

Kico por t’e motibo cu tin tanto avioneta for di Venezuela den e ultimo dianan, lo por ta,
e.o. debi n’e crisis cu tin actualmente na Venezuela, sigur relaciona cu e votamento pa cu
e Constituyente diadomingo awor.

Nan no kier ta na Venezuela, pasobra ta spera hopi problema, si mira cu ayera y awe caba
oposicion a canta un paro nacional, cu ta conduciendo na confrontacion serio.

Por mira p.e. na frontera Colombo-Venezuela, cuanto Venezolano ta trata di pasa pa
Colombia, unda riba un solo dia a pasa 11 mil persona.

Esnan cu tin mas placa, manera e doñonan di avioneta ta bin Aruba, unda nan ta probecha
di haci nan compras di loke no tin mas na Venezuela.

Por a mira varios di e Venezolanonan aki den supermercadonan grandi di Aruba ta haci
nan compras, loke sigur ta positivo pa nos economia.

Claudio Stamper, como Gerente General di Aviacion General, a confirma cu como
compania, nan tambe ta sinti efecto di e situacion na Venezuela. E trafico cu avioneta a
cay considerablemente, cu sigur ta afecta e compania na su entrada.