Page 5 - RIU

December pasa, rumannan Nikita y Kirill Mordashow a haci locual nan tata a pidi nan y nan a a transferi
nan accionnan di un compania di mina pa nan tata e oligarca. Alexey Mordashov a duna su yiunan
accionnan den su companianan pero nan no tabata cla pa esey, segun un persona yega na nan. Dos luna
despues cu Rusia a invadi Ucrania, Mordashov a bolbe trece cambio y ya no tabata kier accionnan y a
pasa algun na balor di como un biyon dollar pa Marina Mordashova, mama di cuater di su yiunan. Riba e
mesun dia ey, Merca y Union Europeo a pone un embargo riba tur pertenencia di Mordashov na Europa.

Pakico e articulo aki di Wall Street Journal ta relevante pa Aruba? Pa motibo cu Mordashov ta doño di
Unifirm Limited cu ta e accionista mas grandi den e compania biahero y di aerolinea TUI, cu 29,87
porciento di e accionnan. Y TUI ta 49 porciento doño di e cadena hotelero RIU, cu tin dos propiedad na
Aruba tambe.

Mordashov a sali di su inversionnan na Merca despues cu Rusia a anexa Crimea na 2014. E aña ey el a
bende dos planta di staal pa un balor combina di 2.3 biyon dollar. Na 2018, Merca a sanciona un di e su
companianan pa asisti den entrega turbinanan na Crimea. Pero na Europa, Mordashov a cuminza
cumpra accion den e gigante di biahe Aleman TUI y durante e collapse di turismo global entre 2020 pa
2022, el a pone mas capital pa yuda e finanzas di TUI.

Mordashov tin siete yiu cu tres diferente mama y na 2019 a transferi gran parti di TUI y e compania Nold
Gold pa su yiunan Nikita y Kirill. Pero fin di December, e dos rumannan, di 21 y 22, a bolbe transferi e
accionnan di e dos companianan pa nan tata. E accionnan di TUI a pasa pa medio di subsidiarionan cu e
ta controla pa un entidad yama Ondero Ltd.

Riba 28 di Februari 2022, Union Europeo a anuncia sancion contra Mordashov y otro oligarca. Motibo di
e sancion su contra ta cu e ta na cabes di Severgroup cu ta doño di 5.4 porciento di Bank Rossiya, cu ta e
banco personal pa oficialnan senior di Rusia. Union Europeo a bisa cu Rossiya a habri sucursal den e
region di Crimea na Ucrania, cu ta yuda Rusia consolida e area cu el a anexa den forma ilegal. Ademas,
segun Bruselas, Severgroup tin hopi accion den un grupo di media cu ta controla stacionnan di television
cu ta sostene e intento di Moscu pa destabilisa Ucrania.

https://www.bondia.com/accionista-principal-den-tiu-y-cadena-hotelero-riu-sancion-riba-oligarca-ruso-
mordashov-y-su-conexion-cu-aruba/