Page 71 - AHATA

E uzo di fondonan di e pais ta bolbe bini dilanti ora papia di e necesidad di turismo den
e proximo decada. Sector di turismo mester ta prepara proyectonan real pa adapta na
tempo moderno y placa cu mester subi mesa pa por realisa cambionan.

DIARIO ta sigui tur desaroyo cu ta relaciona cu turismo di acerca y ta controla tur
fuente di noticia y movecion mundial den e sector sumamente complica di turismo.

Pa loke ta trata e futuro directo cu ta e resultado cu problemanan regional y mundial tin

pa Aruba, Jetblue a confirma e apertura cu DIARIO a presenta pa Aruba busca
crecemento turistico a base di e medida Mericano pa baha vuelonan entre Merca y
Cuba.

Jetblue tabata e prome aerolinea cu despues di 50 aña, a realisa vuelonan pa turista
entre Merca y Cuba. Despues di menos cu cuatro aña, Jetblue a anuncia cu e ta baha su
vuelonan pa Cuba y ya a anuncia cu Guatemala lo ta un destinacion cu mas vuelo for di
Merca.

Turismo den un mundo di competencia creciente ta exigi actuacion rapido, mas ainda si
tuma nota di e forma rapido cu exigencianan di turista ta cambia.

E adaptacion di e producto turistico Aruba pa loke ta trata planificacion di e
infrastructura, no a tene na consideracion e cambionan adapta y mester admiti cu
Aruba a gasta demasiado placa na tram y fietspad mientras robot y internet ta bira
esencia turistico moderno.

E pregunta grandi ta keda, si Aruba tin e capital necesario tanto di parti comercial como
gubernamental pa haci e cambionan aki despues cu Aruba a haci debenan grandi pa
futuro pa proyectonan sin mira riba futuro.

Tecnologia ya ta domina sigur cerca e generacion mas hoben pero tambe cerca e
generacion nobo di hende di edad. E cantidad di hende grandi cu ta biaha sin pareha a
subi y loke nan ta busca tambe a cambia. Hopi ta busca contacto social cu hende di nan

edad cu ta mas dificil na nan cas.