Page 55 - CMB

Tjon durante su discurso a splica cu e desaroyonan relevante pa Aruba aworaki den
relacion cu Reino ta encera supervision financiero, desaroyonan actual di e situacion cu
Venezuela y e “Geschillenregeling.” A argumenta cu pa surpasa e retonan menciona ta
necesario cu e paisnan den Reino a base di igualdad percura pa e necesidadnan mutuo di
Reino y alabes duna e sosten necesario.

BASE UNILATERAL

Aruba ta enfrentando y ta reconoce su retonan como isla chikito y semper tabata
dispuesto pa acepta ayudo y sosten di Reino. Pero, e ayudo y sosten no por sali for di un
base unilateral. Tjon durante su disertacion a argumenta cu un Reino fuerte ta significa
ofrece miho sosten y duna otro como pais e espacio pa desaroyo teniendo na cuenta e
situacion local riba tereno social, economico y financiero. Tambe, un Reino fuerte ta
significa duna otro oportunidadnan y derechonan igual como pais.

RETO FINANCIERO

A splica cu Aruba ta enfrentando retonan financiero, retonan cu e situacion di Venezuela
pero tambe retonan hopi grandi riba tereno social. E delegacion di Aruba recientemente a
aserca e representantenan di Hulanda cu tabata riba e isla cu e pregunta di con nan ta mira
e desaroyonan riba Aruba. E representantenan Hulandes, en corto, a conclui cu tin un
presion social grandi riba e isla, su institucionnan y e comunidad. Pa motibo di e
situacion financiero precario, e presion ta enorme.

PASO CONCRETO

Mirando e desaroyonan actual, Parlamento di Aruba ta tumando pasonan concreto pa
mehora esaki. E ta di gran importancia cu e accionnan pa mehora e situacion financiero
riba e isla no tin como consecuencia causa mas dolor na e comunidad. E ciudadano di
Aruba mester por a confia cu tur organonan di supervision manera Parlamento y CAFT
tawata tin e bienestar di pais y su pueblo na pecho y como prioridad.

A sigui splica cu control di finansas ta bay man den man cu prioridad corecto di maneho.
Di e forma aki e problemanan social ta ricibi su atencion y ayudo debido y
simultaneamente e economia di pais ta wordo stimula.