Page 27 - KPA

Accidente pisa riba caminda di Hooiberg a cobra bida di un persona

Publication: Thursday, 31 March 2016. Categoria: Policial

ORANJESTAD (AAN): Diaranson den oranan di 12:55’or di marduga riba e caminda principal di Hooiberg pa Santa
Cruz, a keda registra un accidente hopi serio, y asina cu e yamadanan a cuminza drenta uno tras di otro, di biaha
unidadnan policial y di ambulance a presenta na e lugar.
E accident aki a socede net den e area di birada di Hooiberg, banda di Maiky’s Restaurant.
Polis a yega, y topa cu un auto preto Toyota Soarer, un auto cu ta wordo bendi na Japon so desde 1981 te cu aña
2005.
E vehiculo tabata basta kibra, un homber benta riba di caminda no ta reacciona mas y un otro na sanger.
Polis a haya tende di testigonan, cu e Toyota Soarer cu number A-9254 tabata bini for di pariba, posiblemente cu
velocidad halto, y den birada algo a bay robez y e chofer a baha di caminda, dal contra di cura di cas, despues un
baranca, y asina keda tur kibra.
Debi na e impacto, e chofer a wordo expulsa for di e vehiculo, y kizas e caida fuerte riba asfalt a causa su morto.
Polis a cera e area pa specialista di departamento di trafico haci nan investigacion. DIARIO a nota cu Fiscal tambe
tabata presente.
Docter Mungra a presenta y pa 1:25’or di marduga a constata morto di Andrew Furgill Steven Wernet, naci na Aruba
dia 8 di Maart 1994, pues recien a cumpli 22 aña di edad.
E otro herido ta e hoben E.d.C. di 25 aña, kende tin hopi sla y trauma na su curpa, y cu yudanda di Paramediconan a
ser hiba pa Hospital cu urgencia.
Agencia Funeraria a presenta pa asina transporta e fayecido pa Mortuario. Famianan tabata presente e momento ey,
y nan tabata inconsolable.
Paz na su resto y palabra di profundo condolencia na famia di e fayecido.

http://www.diario.aw/2016/03/accidente-pisa-riba-caminda-di-hooiberg-a-cobra-bida-di-un-persona/