Page 19 - flip min.jus

Minister Dowers Den dos siman ta cuminsa instala
cameranan di siguridad

 Mar 10th, 2015
 Local

Recientemente Minister di Husticia mr. Arthur Dowers a yama un reunion cu e team cu ta
envolvi den introduccion di “Camera Toezicht Project”, cual ta un instrumento importante den
combatimento di criminalidad. E maneho di Minister Dowers ta pa busca instrumentonan cu por
yuda baha criminalidad den accionnan combina cu autoridadnan concerni.
Den e reunion aki cu Minister Dowers a dirigi, tambe tabata presente representantenan di
SETAR, cual ta e compania cu lo percura pa e conexionnan wordo haci pa Cuerpo Policial di
Aruba.
E proyecto aki ta den su ultimo fase di preparacion, cu ta encera cu ta pega e cameranan na un
sistema, via cual tin e conexion cu SETAR. Ainda falta pa reuni cu ELMAR pa palabra e ultimo
detayenan pa e coriente cu mester bay riba e cameranan aki di vigilancia.
Den e reunion ya menciona, a keda palabra cu den e proximo dos simannan SETAR lo instala tur
e cashinan necesario pa e conexionnan di e cameranan. Segun Minister Dowers, e ta spera cu
despues di e dos simannan ey, e compania cu a haya e proyecto por cuminsa instala e cameranan
na e diferente puntonan acorda pa na final cuminsa mesora haci e testnan necesario, prome cu e
proyecto bay oficialmente den operacion. “Dado momento nos lo por bay mira kico ta pasa den e
diferente areanan y lo yuda grandemente na aumenta siguridad y reduci cierto riesgonan den nos
pais,” Minister Dowers a duna di conoce.