Page 18 - AVP

Na tantisimo ocasion, DIARIO a papia di e papel di Algemene Rekenkamer Aruba cu ta
e instancia oficial cu ta percura pa gobernacion cumpli cu ley.

A base di investigacion di cada depchi cu gobierno saca, Algemene Rekenkamer Aruba

ta controla si e placa di pueblo a wordo gasta manera ley ta stipula den cuadro di
presupuesto y aprobacion di Parlamento.

Ora papia di e Ley di Contabilidad ta papia directamente di Algemene Rekenkamer

Aruba cu ta e organo cu ta haci e ley realidad den supervision di e sumanan pero tambe
e forma cu ta gasta placa.

E forma cu un gobierno ta gasta placa mester ta transparente den tur sentido. E mester

ta bon planea, bon administra, di acuerdo cu loke pueblo por paga y sin ningun riesgo
pa e pais. Entrada di gobierno mester ta di acuerdo cu reglanan tambe hancra den nos
cuadro di ley.

E Ley di Contabilidad, den cual Algemene Rekenkamer Aruba ta haya su motibo di
existencia tambe, ta prueba cu politiconan no ta doño di placa di pueblo, cu mester por
controla e bon uzo di su placa.

For di 2017 Algemene Rekenkamer Aruba a mustra gobierno anterior, cu e forma cu e
ta mara Aruba na debenan riba termino largo a base di e proyectonan PPS di “Bo
Aruba” ta completamente contra reglanan di bon gobernacion financiero y ta peligroso
pa Aruba.

Segun ley, Algemene Rekenkamer Aruba na forma independiente, ta duna gobierno un
chens pa reacciona riba documentonan basa riba su control. Si gobierno no contesta,
sin e contesta e rapport ta bira publico y pueblo por tuma nota di kico ta pasa.

Ningun rapport di Algemene Rekenkamer Aruba por ta secreto pa pueblo, cu mester
kico ta pasa cu su placa.

Na 2018 Algemene Rekenkamer Aruba a entrega Parlamento e rapport riba 1.6 Biyon di
e proyectonan di Bo Aruba. For di Parlamento a bay un peticion pa Hulanda y pa
Ministerio Publico pa investiga posibel delito den e rapport cu ta ilustra e forma cu a
gasta e placa.