Page 14 - MIN ON Jan 27

Nada pero nada a wordo haci cu edificio di Arco Iris
Kleuterschool!

Publication: Tuesday, 27 January 2015. Categoria: General

ORANJESTAD (AAN) – Matutino DIARIO a bolbe haya reaccion di un par di mayor cu tin yiu
den Arco Iris Kleuterschool, cu ta lamenta cu e aña aki nan yiu ta caba nan school preparatorio
sin cu por a disfruta di e edificio original y su bunita facilidadnan.

Ta trata di mayornan cu constantemente ta pasa wak si tin algun movecion mas cu con chikito e
por ta, pero den henter e transcurso di e dos añanan tras di lomba, nan no a mira ningun
desaroyo, mas bien tur cos ta den “status quo”.

Algun di e muchanan cu ta caba nan school preparatorio na Juni proximo, na Arco Iris (awor
funcionando den un localidad na Dakota), tin ruman den Reina Beatrix School, y logicamente e
mayornan tin como prome opcion pa nan yiu aki tambe wordo admiti na Reina Beatrix.

Pero ta parce cu e school aki tampoco a haya ni bishita di evaluacion ainda, corda pa sikiera
cuminza traha un plan pa dreche.

Kiermen, pa tempo largo e school ta bay keda pendiente di drechamento, y cu e espacio limita cu
tin aworaki cu un school parti den dos pida, un na Dakota otro na Seroe Blanco, te hasta por ta cu
no tur cu drenta eerste klas lo por bay haya un lugar.

Esaki ta trece cune disgusto y decepcion di un grupo di mayor, segun nos redaccion tin entendi, y
ta danki na e maestranan abnega cu ta haci nan maximo esfuerzo pa duna les di calidad den
espacionan no adecua, cu e alumnonan afecta por haya educacion.

Tin mayornan ta pensa cu na lugar di un “health tax” gobierno mester a bin cu un “education
tax” pa drecha schoolnan, cu sigur lo a duna mehor fruto pa e futuro di nos muchanan.

http://www.diario.aw/2015/01/nada-pero-nada-a-wordo-haci-cu-edificio-di-arco-iris-kleuterschool/