Page 29 - Newspaper Clippings Min TTC April 2, 2015

Aeropuerto ta prepara pa Siman Santo: Hendrik Croes: Lo
tin 42 vuelo comercial adicional

W ednesday, 01 April 2015 18:33
Comparti

Aeropuerto Internacional Reina Beatrix semper ta prepara tur su departamentonan mas tanto cu ta
posibel pa acapara e trafico mas intensivo cu ya ta un tradicion en conexion cu Siman Santo.
Tanto na e terminal comercial como esun pa avion priva (pazuid) tur cos ta cla pa brinda e servicio mas
eficiente posibel, sin sacrifica e nivel di servicio halto cu e facilidadnan ta conoci p’e. Hendrik Croes,
kende ta vocero di aeropuerto ta splica cu pa aeropuerto Semana Santa ta core di dia 27 di maart pa dia 6
di april e aña aki y ta spera un cantidad extra di pasahero compara cu loke e ta normalmente. Pa loke ta
trata e parti pazuid di aeropuerto, esaki a conoce un expansion di facilidad pa parkeo di avion, cu lo yuda
evita cu mester cera e aeropuerto rato rato pa via di trafico demasiado halto manera tabata e caso algun
tempo pasa. E terminal comercial lo ricibi 42 vuelo extra, pa cada uno por contra riba 100 pa 150
pasahero. E vuelonan aki ta di e aerolineanan Aserca, Laser, Insel y Aruba Airlines y practicamente tur ta
procedente di Venezuela. Aruba pues ta sigui sumamemente popular den e pais bisiña como un
destinacion pa goza di e dianan di fiesta durante di Semana Santa. E cantidad halto, extra di
pasaheronan yegando Aruba ta algo positivo pa nos tur, e vocero a remarca. Croes ta splica cu e
comunicacion cu tur detayenan di loke ta di spera particularmente durante di e fin di siman a bay pa tur
compania cu ta operacional na aeropuerto y tur e departamento y servicionan. E coordinacion interno
tambe ta “in place” cu cambio di shiftnan, personal extra y tur informacion pa cu cambionan cu ta
aplicabel pa e procesamento mas efectivo di pasahero, el a agrega. Specialmente e parti di “slotting” ta
importante pa asina sigura cu tur vuelo por yega y sali na ora, segun Croes a splica. No tur avion lo por
para na un “bridge” y tin cu mester para na asina yama “remote stands”. Hendrik Croes a pidi pa tene
cuenta cu detayenan importante manera e orario di yegada y salida di avionnan y cu pasaheronan cu ta
biahando mester ta na aeropuerto tres ora prome cu e salida di nan vuelo. Check pa e documentonan di
viahe y formularionan cu mester yena ta nan ordo. Pa loke ta parkeer na aeropuerto pa trece y busca
famia y sernan keri cu ta biahando, Hendrik Croes a pidi pa por fabor haci uzo di e parkeo. Ta miho pa
paga 3 florin pa parkeer cu risca cu e vehiculo ta wordo getakel y mester paga e tarifa di 75 florin pa por
saca e auto bek. Aeropuerto ta conseha su usuarionan pa haci uzo tambe di e
website www.arubaairport.com pa orarionan di tur vuelo y e lista di productonan cu ta prohibi pa hiba
riba avion. “Temporada druk pa aeropuerto ta nificica cu e esfuersonan cu ta wordo haci pa propaganda
tanto e destinacion Aruba como tambe e servicionan cu nos ta brinda na aeropuerto ta wordo aprecia. Y,
si bo mira e cantidad di pasaheronan cu ta yega, e cantidad di vuelonan adicional cu ta bin acerca den un
temporada di vakantie, sigur e ta yena bo cu e satisfaccion,” Hendrik Croes a expresa. El a conclui
bisando cu esaki tambe ta e momentonan cu aeropuerto ta uza pa analisa kico por mehora pa e siguiente
aña.

http://www.24ora.com/local-mainmenu-5/93684-aeropuerto-ta-prepara-pa-siman-santo-hendrik-
croes-lo-tin-42-vuelo-comercial-adicional