Page 23 - MIN JUS 24 FEB 2016

AWEMainta Diaranson, 24 Februari 2016 13

Na Café Cultural

Prome resultadonan
di e investigacion riba
e sitio arkeologico di
Santa Cruz 35

DIAHUEBS dia 3 di maart lo tin un presentacion

sumamente interesante na Museo Arkeologico
Nacional Aruba (NAMA). Prof. dr. Corinne Hofman
y prof. dr. Menno Hoogland di e proyecto ‘NEXUS
1492’ y drs. Raymundo Dijkhoff, arkeologo, hefe di
Departamento Cientifico di NAMA lo presenta hunto
e prome datonan conoci tocante e santana di Santa
Cruz 35.

Desde e hayasgo di wesonan humano y otro material
na 2001 e sitio aki a fascina tanto e academiconan cu
a cuminsa investig’e, como e publico local.
Na 2012, ora cu a ehecuta un excavacion di rescate a
resulta cu tin por lo menos 37 deramento na e sitio.
NAMA como e instancia cu ta investiga, documenta,
cuida y promove nos herencia arkeologico, a dicidi
e tempo ey di no excava henter e sitio, sino bay over
na inicia e proceso pa proteccion di e sitio segun
normanan internacional.
A informa publico pa medio di conferencia di prensa
y actividadnan publico tocante e importancia di e
hayasgo aki y na 2014 a cera un aliansa strategico
di investigacion, cu e proyecto financia pa Conseho
Cientifico di Union Europeo esta ‘NEXUS 1492’.

Investigadonan di e red di NEXUS hunto cu nos
profesionalnan local a continua cu estudio riba e
material di Santa Cruz 35 den 2015 y awo t’asina leu
cu NAMA y NEXUS ta presenta e prome datonan di e
investigacion aki na publico.
E prome datonan aki lo ta disponibel tambe den forma
di un ‘folder’ cu lo ta e prome edicion di un serie di
publicacion nobo di NAMA.
E prome edicion di e serie ta un produccion di
NAMA, NEXUS y ‘Fundacion 1403’ y lo ta disponibel
proximamente tambe riba un plataforma virtual.

E presentacion riba diahuebs dia 3 di maart lo ta na
idioma ingles y ta cuminsa pa 7’or y lo ta den ambiente
di un Café Cultural cu musica di jazz, pasaboca y, sin
falta, algo pa fresca garganta. Entrada ta gratis y un y
tur ta bon bini.