Page 34 - MIN ARENDS

1

Comparti

Dilanti un sala completamente yen Minister di Asuntonan Economico mr. drs. Richard Arends a hiba su
discurso na e 'Small Business Event' diasabra ultimo.

Arends a bisa cu e evento kier logra dos meta. "Na prome brinda tur empresario chikito y mediano como
tambe futuro empresarionan e informacion practico pa mehora nan negoshi, duna nan un guia unda tin
mester y pone enfasis riba aspectonan cu no a tene cuenta cu nan. Nos lo trata topiconan manera
financiamento, impuesto, Recursonan Humano, consehonan strategico, seguro, digitalisacion y uzo di
data. E di dos meta di e evento ta pa inspira tur presente pa mehora nan negoshi, aumenta nan benta of
simplemente tuma e paso importante pa bira un empresario local."
Arends a bisa di lo comparti algun idea y pensamento cu por sirbi pa logra e metanan aki. "2017 ta un
aña prometedor. Hopi cosnan bon, hopi oportunidad. Inicio di rehabilitacion di e refineria ta trece hopi
actividad economico tur rond nos isla. E ultimo cifranan di turismo ta hopi alentador. E cantidad di
bishitante di Merca den algun hotel a subi cu 20%, e RevPar mas cu 9% y e crecemento economico pa e
aña aki ta wordo anticipa na 3,4%. Esaki ta danki na inversionnan den sector priva como tambe di
gobierno cu ta suma un biyon florin. Tur esaki ta resultado di trabounan duro, sacrificionan grandi y
dedicacion incansabel di nos tur." Arends a conta cu asina mes e kier para keto riba un punto di salida.
"Bo no por tin un economia sostenibel si bo actividadnan economico no tin un balor agrega, bo
infrastructura no por sostene bo actividadnan economico y bo calidad di bida ta keda atras."
Arends a conta con ademas di inversionnan den turismo na 2010 e prome Gabinete Mike Eman a inicia
un plan di inversion cu a sirbi 4 proposito: Jump start economia cu tabata gravemente afecta,
frena deterioro di e poder adkisitivo di famianan, aumenta financiamento pa negoshinan y crea cuponan
di trabou. "Ta impresionante pa wak tur loke nos a logra riba tereno di turismo, infrastructura, energia y
tambe den areanan publico: e proyectonan principal a suma riba Afl. 1,2 miyon. Si nos wak aña 2017,
nos ta testigo di un waf di container ultramoderno na Barcadera cu ta cumpli cu reglanan estricto
internacional, obranan infrastructural di mas grandi di e ultimo 30 añanan, un hospital ‘state-of-the-art’
cu por bira un centro di economia di conocemento, areanan rond di nos refineria cu pa e ultimo shen
añanan tabata inaccesibel pa nos y awe nos por usa nan atrobe y un area cla pa desaroya na nos waf
crucero na Oranjestad. Esakinan ta e 5 areanan fisico nobo rond di nos isla cu ta fuente di
oportunidadnan infinito pa tur actividad comercial. E oportunidadnan ta nos dilanti, 'opportunities
ahead' loke ta e nomber di e evento di awe".