Page 14 - MIN VOS

18 AWEMainta Diamars, 17 November 2015

Cifra ta cifra, realidad ta preocupante

Plataforma di
Salud: Control
un biaha pa
aña ta esencial

DIASABRA ultimo a conmemora Dia Mundial di Diabetes na Aruba, cu un

caminata, oportunidad pa controla sucu, presion di sanger y di haci un fitness test
pa promove un mihor estilo di bida, como tambe un mihor cuido di e enfermedad
cronico cu ta afecta 17% di nos comunidad. Sonja Kappel, representante di Dienst
Volksgezondheid den Plataforma di Salud, a expresa cu cifra ta un cos, pero mas
preocupante ta ora e persona ta biba den e realidad di ta diabetico of no sa mes cu
e ta core risico pa ta un persona cu un nivel di sucu no controla.

Sonia Kappel a comenta cu, p.e., ta masha importante p’e persona cu sa cu den su
famia tin enfermedad di sucu, p’e bay su dokter di cas y haci un chekeo. Importante

tambe ta p’e persona realisa cu e chekeo ta un siguransa
p’e temporada cu el a check, pero e mester laga check
su condicion di salud regularmente.
El a conseha p’e persona tambe laga check, ademas di
su nivel di sucu, su presion, su nivel di colesterol, su
peso y e cambionan di peso, pues si su peso a subi of
baha drasticamente.
Papia cu dokter, splik’e loke bo ta sinti, ta bo curpa,
Sonja Kappel a bisa, añadiendo cu ta esencial p’e
persona mes tuma rienda y haci algo na su salud.

Plataforma di Salud ta consisti di 7 organisacion
cu ta traha hunto pa promocion di un mihor salud,
pa conscientisa comunidad di cifranan, pero
principalmente pa splica factornan di riesgo, y

conscientisa pueblo tocante di prevencion y cuido.
Trahando hunto nan ta papia e “mesun idioma” y ta
trece e mensahenan dilanti como un entidad, cada uno
como specialista den su area di prevencion y cuido.
Hunto nan ta sigura cu di un forma of otro e
mensahenan ta yega na mas persona posibel.

Sonja Kappel a subraya cu ta importante pa un persona
preveni enfermedad, pero na momento cu e tin’e
ta esencial p’e sa unda e mester acudi pa ayudo y e
tuma e pasonan y decisionnan propio y no neglisha
su condicion.
Un nivel di sucu no controla ta algo cu ta ora cu ya
tin efecto e persona ta sinti’e, asina mes e por tuma
encargo di su situacion y siña con pa controla su nivel
di sucu mihor posibel, Kappel a conclui bisando.