Page 11 - IVA FLIP 26 AUG 2017
P. 11
Dengue ta un malesa di tipo gripal cu ta afecta tanto e mucha chikito, e mucha den edad
escolar, e hoben y adultonan di cualkier edad unda personanan di edad avanza ta mucho
mas vulnerable mescos e baby.
No ta un malesa necesariamente mortal, pero si e ta dura hopi e situacion di e pacient por
bira grave y kizas necesario pa e hospitaliza. Hopi importante ta cu e pacient mester ta
constantemente hidrata.
E meta di e Dia “D” ta pa concientiza e poblacionnan pa tuma e medidanan preventivo pa
asina e Dengue no wordo transmiti.
E recomendacionnan primordial, cu semper seccionnan di Epidemiologia y Malesa
contagioso di DESPA (Departamento di Salud Publico) ta:
Elimina corectamente tur acumulacion di awa cu por keda para den cas pa asina evita cu e
sangura haya lugar pa broei. Tene contacto cu GKMB en caso cu tin awa para y yen di
sangura rond y den e cas, cu por mustra cu ta sangura di dengue.
Basha awa para den hemchi afo y tene esaki boca abao. Haci limpi minimo cada dos dia e
potinan pa pone flor. Laba bon tur recipiente unda pa un of otro uso ta pone yene cu awa.
Paga tino na unda e awa di airco ta keda para, y elimina esaki. No tene tire di auto benta
den patio. Uza repellent riba curpa si acaso tin hopi sangura den area di bo cas, entre otro
medidanan cu por yuda comunidad combati e sangura. Si no tin criadero no tin sangura y si
no tin sangura no tin dengue.
No mester lubida cu e mesun sangura aki ta responsable pa malesanan manera Zika y
Chikungunya. E dos virus aki tambe ta ocasiona hopi problema mescos cu dengue aunke
nan ta menos mortal. E dengue cu ta ripiti por bira hemoragico cu den cantidad di caso ta
mortal.
E sintomanan ta mescos cu griep, cu dolor di curpa y keintura halto y hopi dolor muscular.
Zika ta peligroso pa e damanan na estado. Y mescos cu dengue e por causa e syndrome di
Guillian Barre. Di hecho, den pasado, Aruba a conoce varios caso di e malesa aki como
consecuencia di dengue.
Pues, ban haci algo mas special awe, riba Dia “D”, Dia mundial pa combati dengue, y pone
extra atencion na tur loke tin paden y rond di nos cas cu por bira un criadero di e sangura
Aedes Aegipty. BAN PREVENI!
