Page 29 - Updated Newspaper Minister Michelle Hooyboer Winklaar

Home Local Minister Michelle Hooyboer-Winklaar: Tur scol lo ricibi material di Conscious
Discipline

Minister Michelle Hooyboer-Winklaar: Tur
scol lo ricibi material di Conscious Discipline

on: Wednesday, June 10, 2015In: LocalNo Comments
Print Email
Algun alumno di Scol Dun’un Man a ricibi Minister Michelle Hooyboer-Winklaar na porta di
scol cu un handschoen bisti. E handschoen aki ta parti di e ritual di saluda di e programa
Disciplina Consciente. Riba cada dede di e handschoen tin un plachi y dor di scoge pa un di e
dedenan ta scoge pa un manera cu bo ke wordo saluda. E por ta por ehempel un sonrisa, un
brasa, un “high five”.
Minister Hooyboer-Winklaar a bishita Scol Dun’un Man pa haci entrega di material pa desaroyo
social emocional. Esaki ta den cuadro di proyecto “Zorgprogramma’s ter ondersteuning van
kinderen en jeugdigen” como parti di e proyecto “Zorgprogramma’s binnen het onderwijs”
financia pa Fondo Desaroyo Aruba (FDA).

Cu e proyecto aki scolnan primario por a scoge programa pa desaroyo social-emocional di nan
alumnonan y un sistema di sigui e mucha den su desaroyo (Leerling volgsysteem).
Recientemente e pedida di material pa e scolnan primario a yega Aruba. E sistemanan di
siguimento di alumno menciona ta digital y ya a manda nan via e-mail pa e scolnan. Pa loke ta
trata e programanan social-emocional, scolnan lo haya nan den e dianan venidero.
E programa social-emocional cu a resalta den escogencia ta e programa Disciplina Consciente
(Conscious Discipline) di Loving Guidance. E pakete di e material di Disciplina Conciente cu
Scol Dun’un Man a ricibi ta consisti di un buki pa cada maestro, cu informacion basico pa
implementa e shete podernan pa mantene control propio y e shete facilidadnan di disciplina
consciente. Tambe ta splica e funcionamento di e cerebro.

Un set di buki pa mucha (Shubert). Cada buki ta conta un storia cu ta siña e mucha un di e shete
habilidad- y podernan cu e por uza pa soluciona problema. ‘Job board’ (borchi di tarea) como un
instrumento cu ta enfoca riba e habilidad di encurasha. Ta pone riba e jobboard e tareanan cu
cada alumno tin den klas.