Page 32 - AVP

Despues di hopi speculacion, diamars den oranan di atardi ex Prome Minister Mike

Eman hunto cu su casa Doina Eman, a tene un conferencia di prensa pa duna un

splicacion riba malesa di Doina.

Ex Prome Minister Eman a splica cu nan kier a comparti cu comunidad nan aprecio pa tur

e apoyo cu nan a bin ta ricibiendo na momento cu salud di Doina ta pasando den reto.

“Man di Creador t’ey pa yuda nos surpasa e momentonan aki,” Mike Eman a bisa.

Como comunidad a sigui asina di cerca e desaroyo aki y a convivi cu nan, a dicidi di

duna un splicacion e situacion actual y mustra na mesun momento cu nan ta aprecia tur e
preocupacion y oracionnan cu ta wordo haci.

Eman a splica cu diaranson ultimo nan tabatin un cita hopi importante cu un Oncoloog.

Na december Doina a haci un operacion, y na januari a haya noticia cu e sitio unda cu a

opera a haya un tumor canceroso y, describi door di specialistanan, como uno complica
pa trata. Pero diaranson ultimo a haya bon noticia y analisando tur e scannan cu a haci,

tanto na Aruba como na Colombia, ta mustra cu no tin nada mas canceroso. Un

“beenmerg onderzoek” manda Hulanda tambe a resulta limpi. Unda cu a opera tabatin

cancer y pa e motibo ey, specialistanan ta recomenda un tratamento di kimoterapia cu lo

cuminsa diaranson mainta. E lo tin un duracion di cuatro luna y mey. “E ta un lucha duro

y nos lo bay ta cu Doina pa dun’e e apoyo pa surpasa e momento dificil aki. Tin hopi

pashent na Aruba cu a pasa den esaki y sa kico e tratamento ta nifica y e incertidumbre y

siguridad cu e ta trece cun’e. P’esey e apoyo cu nos ta haya di comunidad, nos ta hopi

agradecido na nan. Pero tambe na coleganan di mi partido cu a tuma hopi di mi

encargonan. Mi a reuni cu fraccion pa splica nan cu den e proximo lunanan lo mi tin mas

reto pa sostene Doina,” Eman a bisa.