Page 23 - min.vos sept 3,2015

AWEMainta Diahuebs, 03 September 2015 21

Atletanan di bela,

Nicole van
der Velden y
Thijs Visser ta
concentra riba
Weganan Olimpico
di Rio 2016

DESPUES di nan logro historico den e campeonato

mundial di Nacra 17 na Aarhus, Dinamarca unda
nan a clasifica p’e Weganan Olimpico di Rio de
Janeiro 2016, e atletanan di bela Nicole van der
Velden y Thijs Visser ta den pleno concentracion pa
dicho weganan.
Actualmente e duo Van der Velden y Visser ta
na Aruba pa algun dia di descanso despues di a
permanece pa mas cu 3 luna na Rio de Janeiro, unda
nan a entrena y participa na un competencia di nivel
mundial cu mayoria atletanan clasifica.
E duo di Aruba t’e promenan den historia di nos
deporte cu a clasifica oficialmente pa Weganan
Olimpico. Esaki sin duda ta un prestacion y logro
unico.

Den un entrevista sostene cu ambos atleta, nan a
conta cu e clasificacion tabata algo grandi pa nan.
Durante di e campeonato mundial nan a sinti
comodo y nan tabata sa cu nan lo duna un bon
prestacion, aunke a sufri contratempo dor di un
mast kibra.
Riba e ultimo dia e duo di Aruba a nabega bon y
cu e resultado final nan tabata mas cu satisifecho
mirando e nivel di esaki.

Mester bisa cu na Rio de Janeiro e duo ta buscando
tur forma pa adapta n’e circumstancianan di
e awanan di e ciudad den cua mester nabega.
Esakinan lamentablemente no t’esun mas higienico
y saludabel p’e curpa humano.
E organisacion ta trahando duro pa mehora esaki
pa otro aña. Nan entrenamentonan a bay den bon
forma, cada dia nan mes ta wak progreso den nan
mes.

Pa Nicole y Thijs e ta un orguyo di por representa
Aruba den exterior. Nicole a lanta for di chikito na
Aruba y ta sinti’e mas parti di e isla aki.
Di otro banda Thijs ta masha contento cu Aruba
a acepte cu man habri y ta mas cu orguyoso di
representa manera e mes a bisa: “cu un bandera
nobo”. Otro siman e duo lo regresa Rio de Janeiro
pa sigui cu nan preparacion Olimpico.