Page 5 - KPA 8 APRIL 2016

Eric Lake di JZP

Investigacion den caso di maltrato di baby ta continuando y riba bon caminda

Thursday, 07 April 2016 20:58
Comparti

Hefe di departamento di Jeugd en Zeden Politie, sr Eric Lake a confirma cu investigacion den e caso di maltrato
serio contra di un baby di apenas algun luna dor di su propio tata, ta continuando y henter e proceso ta canando
segun reglanan stipula pa e codigo penal.

Ta trata aki di un caso serio di maltrato di un criatura di apenas algun luna caminda e baby a wordo hospitalisa cu
trauma na cara y na su bariga caminda ta ser sospecha cu e tata di e baby, lo a comete e barbaridadnan aki.
Sr. Lake a mustra cu detencion di e tata a wordo prolonga pero dificil e por divulga informacion riba e caso aki, ya
cu ta den pleno investigacion y e departamento di JZP ta trahando riba dje pa asina e proces verbal wordo
entrega na Ministerio Publico cu na su turno lo presenta esaki na Corte di Prome Instancia.
E hefe di JZP a mustra cu ta trata di un caso hopi serio y tambe a señala cu no por bisa mucho ki rumbo e caso ta
continuando ya cu ainda tin cierto puntonan cu tin cu wordo atendi den e investigacion pero cu tur cos ta
canando den bon direccion.
Pa loke ta e discusion cu tin den comunidad den ultimo tempo riba e castigonan cu ta wordo aplica den e tipo di
casonan di abuso contra muchanan, sr Lake a mustra cu pa loke ta su departamento, nan ta forma parti di e
investigacion y ora cu esaki keda cla nan ta entrega e rapport na Ministerio Publico cu lo sigui cu e proceso contra
di e sospechoso.
Su persona por tin su propio opinion riba cierto castigonan cu ta wordo aplica pero cu tin casonan serio cu a tuma
luga caminda a aplica un castigo pisa riba e abusado, entre otro mencionando un tata cu a ricibi un castigo di 8
aña di prizon pa maltrato di su baby.
Sr Lake no por a duna informacion tampoco si lo por tin mas detencion cu lo por cay den e caso aki ya cu tur esaki
ta forma parti di henter e etapa di investigacion y tampoco por a duna mas informacion riba desaroyonan
relaciona cu e caso lamentabel aki, cu a wordo condena severamente den comunidad.
E hefe di JZP si a mustra cu informacion cu na a ricibi riba salud di e criatura, ta cu esaki ta recuperando
satisfactoriamente loke sin duda ta un bon noticia pero ainda no por papia riba kico a conduci cu a tata a maltrata
su propio baby di e forma aki.
E oficial di e departamento aki a mustra cu den e tipo di casonan aki Ministerio Publico ta cana un proceso mucho
mas rapido cu den otro tipo di casonan ya cu ta casonan cu tin su efecto riba comunidad y lo ta bon pa trece
trankilidad den comunidad bek a base di un proceso rapido.
JZP ta cumpliendo cu su trabou di investigacion cu ta wordo guia un haci riba indicacion di Ministerio Publico y ta
di spera cu pronto esaki lo wordo conclui y cu e sospechoso den e caso serio aki, lo presenta dilanti di Hues pa e
duna cuenta di su acto di maltrato contra di su propio yiu di apenas algun luna bieu.

http://www.24ora.com/policial-mainmenu-8/107256-eric-lake-di-jzp-investigacion-den-caso-di-
maltrato-di-baby-ta-continuando-y-riba-bon-caminda