Page 24 - AAA front cover_Neat

Na Aeropuerto atrobe mas Taxi pirata kita for di caminda

Publication: Wednesday, 27 May 2015. Categoria: General

ORANJESTAD(AAN): Cu aumento den cantidad di turismo, ta bin tambe un aumento den
cantidad di individuonan cu ta “hunga taxista” riba e isla.
Departamento di Transporte Publico tin man yen di trabao pa combati e fenomeno di “taxi
pirata”, loke ta conduci na intervencion di Polis tur dia.
Pa colmo, awor tin “taxi pirata” cu ta hasta duna nan cell-number, pa asina bo yama y pidi
servicio.
Diamars atrobe a topa cu un taxi pirata, cu a trece un cantidad di turista Aeropuerto. E chofernan
aki no ta paga ningun tipo di impuesto, no tin seguro special pa pasaheronan den e auto, no tin
permiso pa funciona como taxista y tampoco ta paga pa ta riba tereno di aeropuerto.
Esey a pone cu tanto siguridad di aeropuerto como personal di DTP y cu ayudo di Polis a bay
den accion mesora.
Den casonan asina ta duna multa na e chauffeur, tin biaha hasta a kita e vehiculo completo.
E por zona un poco drastico pero e realidad ta cu taxi pirata no solamente ta nifica menos entrada
pa caha di Gobierno pero tambe e ta forma un peliger pa nos turismo. Hendenan no autorisa y sin
ta prepara, ta subi caminda cu turista, probablemente cobrando menos, pa transporta nan di un
punto pa otro.
Y si nan haya accidente, corda cu AZV lo NO paga pa bo cuido medico, mucho menos e
Aseguro regular di e Taxi Pirata.