Page 5 - 18j24

DIAHUEBS 18 JANUARI 2024 DIARIO PAGINA 5
Lider Sindical Edward Maduro:
Bloke Sindical ta desmenti categoricamente
cu bashi premie, reparatie premie
Gelijkbedrag ta finaliza na 2024

ORANJESTAD (AAN) – Edward Maduro, dirigente sindical
di SADA y representando e Bloke Sindical, a declara den
conferencia di prensa tocante e temanan di bashi premie,
reparatie premie y Gelijkbedrag, el a bisa cu e sindicatonan a
scucha un declaracion di Minister Presidente aña pasa, cu por
wordo caracteriza como un mal informacion na pueblo y sigur
na e ambtenaarnan.
Esey ta cu e premienan aki ta caba e aña en curso.
Bloke sindical ta desmenti esaki categoricamente,
pero mas bien Edward Maduro a señala cu ningun momento e
premienan aki por finaliza e aña aki, pasobra nan ta papiando di
un inhaalmanoeuvre unda cu gobierno a keda debe indexering
den e añanan anterior, cu causa cu nan freeze indexering.
Ambtenaarnan por corda cu na aña 2002 cu 2007, si por corda
bon, a congela como 6.7% di indexering y ora cu gobierno
a sinta cu sindicatonan na 2014, a yega na un palabracion
mirando cu e situacion financiero di gobierno, e tempo ey, no
a duna pa indexer e salario di ambtenaar, pasobra esey lo a
conduci na gastonan hopi halto pa gobierno.
Maduro a sigui bisa cu e tempo ey e sindicatonan
a bay di acuerdo pa ahusta e premienan cu tabata existente
caba e tempo ey cu ta e bashi premie y e gelijkbedrag esun di
November, y tambe a bay di acuerdo pa un premie nobo cu a
wordo duna na Augustus, y unda cu gobierno mester a keda
paga tur aña un aumento den e premienan aki, pero esakinan
ta un manera pa compensa e perdida di forza di compra.
“Pues, no ta cuestion cu aña 2024 a yega anto ta
ultimo aña di e premienan aki. Esaki ta un pensamento
eroneo di gobierno pero nos a ripara cu tin hopi ambtenaar
cu kizas no ta compronde e materia aki den su totalidad.
Pa e motibo aki tambe nos kier a bisa e ambtenaarnan y tur
empleado publico cu esaki ta premienan cu tin cu keda wordo
paga tur aña manera cu nan ta. Bo por considere mescos cu
ATV dagen cu no ta pa pret gobierno a bin ta duna esakinan
pero ta indexering cu den pasado, gobierno a keda debe na
ambtenaarnan”, Maduro a splica.
El a señala cu ora el a scucha cu Minister Presidente
a indica cu e premienan aki ta bay yega na final na 2024,
sigur e no ta cuadra y sindicatonan ta lamenta cu gobierno ta
bay den e direccion aki, pasobra cueste loke cueste, ta pone
e ambtenaarnan manera cu no ta importa kico nan ta perde.
“Pero sigur e sindicatonan responsable y conforme e acuerdo
bilateral ta bisa cu gobierno no por riba su mes dicidi kico ta
bay haci cu placa di ambtenaar”, Edward Maduro a reitera cu
enfasis.
P’esey tambe otro siman bloke sindical ta bay
toca e temanan aki cu gobierno pa trece claridad, pasobra
sindicatonan por sali bisa hopi cos, pero hopi biaha gobierno
ta hunga un wega di wak kico ambtenaarnan ta bay haci, locual
nan ta haya hopi lamentabel pasobra ta mustra cu gobierno no
ta un bon dunador di trabao.