Page 9 - 16s24

DIALUNA 16 SEPTEMBER 2024 DIARIO PAGINA 9
Pader Andres di Misa di Savaneta y Vicario
Episcopal a splica:

Na Misa di Savaneta a inaugura
Kapel di Santisimo Sacramento pa

celebra apertura Aña di Hubileo

ORANJESTAD (AAN) – Diadomingo 15 di September 2024,
a tuma lugar e inauguracion di Aña di Hubileo local di e
Parokia di Savaneta, cual a wordo funda dia 15 di September
di aña 1900. Asina Pader Andres, Pastor di Misa di Savaneta
y Vicario Episcopal pa Aruba, a duna di conoce.
For di Diadomingo 15 a pasa pa Aña di Hubileo y
como acto di apertura di Aña di Hubileo, a haci inauguracion
di Kapel di Santisimo Sacramento.
Pader Andres a splica cu esaki ta un soño, un proyecto,
cu tabata tin for di hopi aña y por fin, pa aña di Hubileo a
reserva un parti pabao di e coro, un espacio di mas of menos
20 meter cuadra, pa 20 persona, unda di forma permanente lo
tin Santisimo Sacramento expone. E kapel ta habri tur dia for
di 7.30 or te 7 or anochi.
“Pa nos Catoliconan esencial ta Hesus presente den e
Eucaristia. Si otro Iglesianan kizas ta mira e Ultimo Cena, e
Bankete Eucaristico, como algo simbolico, nos ta kere den e
presencia di Hesus den Eucaristia, pesey nos ta ador’E, nos
ta alab’E, p’esey e Santa Comunion, p’esey e importancia di
Misa di Eucaristia, di Consagracion, di Adoracion, y esey ta
e razon cu nos tin un kapel asina”, Pader Andres a señala y a
reitera e palabranan di un Cardenal cu ta bisa cu parokianan
cu no tin Santisimo ta parokianan morto of enfermo.
“T’asina cu nos kier promove ante todo, oracion den
nos Parokia, pa medio di e kapel nobo aki”, Pader Andres a
acentua.