Page 17 - DIMP

Un 40% a paga e impuesto di full e aña y 13% a paga e impuesto di mitar aña. Esey ta
nifica cu tin 53%, un tiki mas cu e mitar pago. Pero mirando e periodo cu nos ta aden, cu
falta ainda 7 dia di trabao pa por yega e fecha final, tin cu bisa cu esaki ainda ta hopi
abao, segun Meverly Romano.

Nan sigur ta desea cu e 53% lo ta 80% paga. Pero 53% ta net un tiki mas cu e mitar. Esey
ta nifica cu falta hopi ainda.

N’e 53% di e numbernan cu tin paga, DIMP kier a gradici nan pa nan cumplimento. E
personanan aki a demostra cu nan ta respeta nos leynan, cu nan ta tene cuenta cu nan
responsabilidad fiscal. Esey ta algo hopi importante den un mundo di belasting. P’e resto
cu ta falta, cu ta 39.731 plachi di number, no tin ningun pago mes registra riba nan.

Esey ta 45% di e total cu tin registra, di cual e categoria mas grandi di incumplimento ta
keda e plachinan di number A cu un total di 34.685, cu no tin ningun pago mes registra.

Ni di mitar aña, ni di full aña.

Posiblemente e clientenan aki tambe den nan tin un grupo cu no tin añanan anterior paga.
Ta p’esey tampoco nan no lo por paga 2019.

Pero hecho ta keda si cu e ta un cantidad hopi grandi. 34.685 den plachi di number A so,
ta hopi halto, segun Meverly Romano. Cu e otro categorianan hunto e ta yega na 39.731.

Despues tin 2% cu no tin pago riba nan, pero esaki t’e personanan cu a entrega nan plachi
di number.

Posiblemente nan auto no ta den uzo y nan ta entrega nan plachi di number, cu esey ta
haci cu nan no tin mester di paga e belasting mesora.

Si wak e cifranan aki y wak cu falta ainda 7 dia pa 28 di februari yega, e ta bisa tambe cu
e dianan cu ta sigui lo bay ta sumamente druk. Ta haya si cu un parti ta bay paga via
banco, pero si yega na un averahe di e cantidad di dianan cu tin, ta yega na un averahe di
5 mil number cu lo mester ta paga pa dia, si e cumplimento ainda sosode pa dia 28.

E cantidad ey ta hopi halto. Si 2 mil di e personanan ey yega na Camacuri of na cualkier
otro oficina di Impuesto, no lo por atende e cantidad ey pa dia.

Esey ta bay keda un hecho cu Departamento di Impuesto lo bay ta sumamente druk den e
proximo dianan. Loke ta bay sosode ta cu no por bay duna un cantidad hopi grandi di
number na e clientenan cu ta acudi.