Page 13 - MIN VOS JULY 17 2015

AWEMainta Diaranson, 15 Juli 2015 19

Den Weganan Panamericano Toronto 2015

Duo di beach volleyball,
Eargenell de Cuba y
Mitchell Daniel no por a
percura pa un sorpresa
contra di Venezuela

E Weganan Panamericano 2015 a termina pa e duo den e

deporte di beach volleyball, Mitchell Daniel y Eargenell de Cuba.
Diaranson anochi laat, e duo Daniel y De Cuba a enfrenta e duo
fuerte di Venezuela, Henriquez y Villafañe.
Mester bisa e miho wega cu nos a wak e duo di Aruba hunga den
e Weganan Panamericano aki. Nan a bataya bon y realisa algun
hugada formidabel, pero atrobe den momentonan crucial no por
a mantene nan mes den e wega caminda ta laga e contrincante
avansa cu margen grandi den punto.
E prome set, e duo di Venezuela ta gana cu e score di 21 - 14,
mientras den e di dos set, Venezuela ta gana cu e score di 21 - 13.
Pa Eargenell y Mitchell e Weganan Panamericano cu no a bay
manera nan a desea mirando cu aunke nan a enfrenta e miho
duonan di beach volleyball den e continente America, nan
propio estilo di wega no a resalta.
Hopi biaha suerte di loting tambe ta hunga un rol importante
ya cu Aruba sigur tabata den un di e poolnan di mas duro cu
Brazil, Mexico y Venezuela. Kisas den un otro pool nan lo tabata
tin mas chens.
Combersando cu e hungadornan riba nan prestacion, nan a
indica cu den e aspecto tecnico esaki a mehora den gran forma
pero e sistema tactico tin hopi pa traha riba dje ainda, sigur den
traha punto.
Tambe nan mester ta mucho mas consistente den nan propio
wega. Nan focus ta pa logra un miho papel di e proximo
oportunidad cu presenta.
No obstante cu Aruba a perde tur tres wega den e Weganan
Panamericano aki, tin cu bisa cu e deporte di beach volleyball
tin den Mitchell Daniel y Eargenell de Cuba un bon futuro.
Mester sigui traha duro pa asina aki cuater aña ta mucho mas
miho como ekipo.