Page 14 - ATA

Karel Maduro; Iregularidadnan di Aruba awor ta pasa bay
Bonaire tambe

Sunday, 08 February 2015 15:14
Comparti

Nos tin añanan ta indicando y advirtiendo e pueblo tocante di iregularidadnan di gobernacion na Aruba.
Nada no a cambia solamente cosnan a bira peor. Amigo y conocirnan ta gosa di placa di pueblo y
mientras tanto debe nacional di Aruba ta sigui subi y pueblo tin di paga esaki.
Den turismo tur dia ta fiesta tin pasobra cosnan ta bayendo asina bon pa turismo (un miyon a yega Aruba
toch segun Otmar?). Di otro banda no tin placa ta sali for di turismo pa paga debenan di Aruba. Pero tin
hopi otro hendenan si cu ta probechando di placa cu ta lora den turismo. Companianan liga na
politiconan y amigo y conocirnan di ehecutivonan halto di ATA, ta biba dushi bay riba placa cu ta lora
den turismo. Awor iregularidadnan a crece y pasa frontera. A lanta un partido na Bonaire cu un señor
Elvis Tjin Asjoe kende ta casa di Director di ATA, y gastamento di placa di Aruba ta tumando luga eynan
for di den campaña caba. Trahadonan di gobierno y colaboradonan di Ministernan ta drumi, come, bebe
y gosa na Bonaire, derochando placa di pueblo di Aruba. Algo mas cu 40 hende a subi avion bay gasta
placa di pueblo di Aruba na Bonaire, mientras cu ta castiga pueblo di Aruba cu medidanan. Minister
Presidente ta sinta cu su mannan riba otro y ta laga tur e iregularidadnan aki tuma luga. Companianan
cu ta ricibi trabownan lucrativo cerca ATA (un tal Terra Cora) ta tras di campaña di Elvis Tjin Asjoe na
Bonaire. Mientras tanto nos ta investigando si Elvis Tjin Asjoe mes ta ganando placa ainda di comunidad
di Aruba. E ta coordinador di sr. Mike Eman pa mas o menos 12.500 florin pa luna! Tin indicacion cu via
di un compania, ainda Elvis Tjin Asjoe ta ganando placa di comunidad di Aruba. Tambe nos ta tras di
informacionnan di gastamento di placa formal den ATA y cu posible vinculo cu señor Elvis Tjin Asjoe.
Elvis Tjin Asjoe ta coriendo un campaña miyonario na Bonaire y cu 50 hende riba su lista di MPB. Awor
saca bo som, si aki na Aruba partidonan ta bay eleccion cu 29 hende riba lista y Aruba tin alrededor di
110.000 habitante, con ta posibel cu un partido na Bonaire ta bay eleccion cu 50 hende riba lista? Di
unda e placa pa core campaña ta sali? Pueblo di Aruba, mi ta spierta boso y boso ta mira cu gastamento
di fondonan di Aruba ta pasa frontera tambe y bai Bonaire. Mesun cos nos lo no para wak sin haci nada.
Nos ta bay demanda un investigacion profundo di ATA y Ministerionan caminda iregularidadnan ta
tumando luga. Tambe nos lo sigui di cerca tur e colaboradonan di Ministernan cu riba custia di pueblo ta
bay Bonaire y gasta placa di Aruba den campaña di compinchinan politico. Nos si no lo keda man crusa
manera Prome Minister, Mike Eman. Mientras pueblo di Aruba ta sufriendo, gastamento diplaca ta sigui
y awor derochamento di placa a pasa frontera bay Bonaire tambe.