Page 58 - CITGO

De Cuba tambe a duna ehempel di ATCO cu ta trahando seriamente den un forma

sostenibel, unda cu nan desperdicionan di construccion ta wordo uza, kibrando esaki te na

e minimo y uz’e despues como materia prima pa traha bloki. Esaki ta un paso den bon

direccion, el a bisa y cual ehempel mester wordo sigui door di otro companianan den nan

mesun ramo. “Mi ta aplaudi ATCO pa e paso cu nan a tuma den e ramo aki.”

Segun Kevin de Cuba, pa motibo cu e economia ta depende casi completamente di

servicio y ta importa 95% di tur loke ta uza y consumi aki, e caminda pa cuminsa ta

busca forma pa importa material y productonan cu ta cumpli cu e rekisito di un maneho

sostenibel, cu ta bio-degradabel, cu no ta toxico y cu despues di su prome uzo ora cu tire

afo, e no ta causa daño na e medio ambiente. Su conseho ta pa companianan uni den

importacion di un material manera ariba describi. Asina por ehempel por importa cierto
material cu na final por wordo recicla y uza como compost den agricultura.

Aruba aworaki, el a bisa, ta den un fase di transicion unda cu mester resolve e problema

actual y na mesun momento traha paralelo cumprando material di bon calidad cual por

wordo re uza. Aruba su tamaño ta encera cu no tin un mercado suficiente grandi pa haci
reciclahe di sushi cu ta bay dump. Un solucion por ta waste to energy cu a termino corto

ta un bon solucion. Pero ora cu haci un inversion grandi den reciclahe di sushi, mester tin
siguransa cu ta sigui bay tin desperdicio pa por sigui opera. Pero esaki ta algo cu

stakeholdernan mester discuti si e ta un solucion pa largo plaso. Pesey e ta bisa cu e

solucion di dump no ta facil.

E ta conseha pa cambia e pensamento riba e tipo di materialnan cu ta wordo importa
mientras cu ta pensa riba e solucion pa dump. Cambio mentalidad di pueblo no ta algo cu

por sosode lihe, prome mester busca alternativanan factibel a termino corto. Un bon

forma ta e proyecto di Eco-Gas, ya cu e ta aporta na crea un otro fuente di energia pa

Aruba, cu por wordo uza di diferente manera, den sector energia, transporte of pa cas.