Page 55 - Min.on

Studiantenan internacional ta inicia e programa di
‘Solucionnan di Isla Sostenibel Aruba’

Local
26 May, 2015

Studiantenan di Arizona State University (ASU), University of West Indies (UWI) y Universidad
di Aruba a cuminza cu e prome programa di e Aruba Summer School, organiza bou auspicio di e
Caribbean Branch di TNO, CBOT.
Prome Minister Mike Eman a atende e prome dia di e programa, teni na Universidad di Aruba.
Prome Minister Eman a determina e obhetivo pa Aruba na 2020 ta 100 porciento dependiente di
fuente di energia renobabel y tabata instrumental pa facilita e establecimento di e sucursal
Caribense di TNO na Aruba.
E studiantenan, tanto na nivel di Bachelor’s como Masters a reuni na Aruba pa sigui un
programa di dos siman cu tin como titulo ‘The Aruba Sustainable Island Solutions’ cu ta diseña
pa uza Aruba como un ehempel di estudio pa sostenibilidad di islanan cu ta confronta cu e
realidad di un escala chikito y isolacion. Islanan ta experiencia reaccionann mas liher, sea ta
positivo of negativo, cu ta nifica lesnan importante pa sistemanan di escala mas grandi. Mas
ainda, islanan ta rekeri un acercamento diferente y specializa netamente pa motibo di nan escala
di economia chikito y ambiente socio-cultural.
Como tal, e estudio di Aruba lo sirbi como base pa analisis continuo, mirando cu e studiantenan
aki lo gana experiencia den desaroya solucionnan contextual riba sostenibilidad den un ambiente
multi-cultural y trahando den ekiponan interdisciplinario.
E programa di e Aruba Summer School ta inclui presentacionnan y sesionnan di estudio riba
temanan di proyecto cu ta inclui energia renobabel, tratamento di awa, economia local y
desaroyo comercial, turismo sostenibel y transportacion electrico. Eparticipantenan lo atende
sesionnan na e edificio APEX di Universidad di Aruba y na e Edificio Edward Cheung, y
ademas lo bishita diferente lugar rond di nos isla pa mira personalmente con ta aplica
solucionnan sostenibel den practica, manera WEB, ELmar, hotelnan. Ademas, nan lo
intercambia pensamentonan cu expertonan local di TNO y Universidad di Aruba.
Banda di e Aruba Summer School, Caroline van der Weerdt di TNO lo dirigi un estudio ‘
Customer Journeys for Sustainable Solutions’ unda e lo topa cu diferente grupo di enfoke
procedente di e sociedad comercial di Aruba.
Resultadonan di ambos estudio, esta di e Aruba Summer School program como di Sra. van der
Weerdt lo keda presenta na conclusion di e programa, dia 5 di Juni, durante un simposio organiza
pa CBOT na Universidad di Aruba.
E Aruba Summer School ta desaroya como un colaboracion entre CBOT, Universidad di Aruba
y Arizona State University.