Page 35 - AVP

ORANJESTAD (AAN)- Segun Parlamentario Micheal Lampe Gobierno na e momentonan
aki, no a entrega presupuesto 2020 ainda na Parlamento caminda nan ta casi cuater
luna laat cu esaki y mientras cu Parlamento di Aruba mes no ta na altura ki tempo
esaki lo tuma luga, por bisa cu Hulanda ta mas na altura di e proceso aki cu Parlamento

di Aruba.

Michael Lampe di fraccion di AVP ta mustra cu fuera di no por a cumpli cu e ley di
comptabilidad dor di entrega presupuesto pa dia prome di September, ni sikiera e

presupuesto supletorio 2019 ainda no a yega Parlamento.

“Ora cu gobierno di Reino bisa cu ya nan no ta kere ni confia den e maneho financiero
di Prome Minister Evelyn Wever Croes y Minister di Finansa Xiomara Ruiz Maduro, nos

por compronde esaki totalmente.

Sigur ora cu mira cu gabinete Wever Croes no por ni cumpli ni cu su mes, ni cu ley y
reglanan di pais Aruba, corda pa cumpli cu loke nan a priminti gobierno di Den Haag,

algo cu a bira e forma di procede di e gabinete actual.

E Parlamentario a sigui bisa cu Aruba tin un gobierno cu for di prome dia den
gobernacion a faya barbaramente cu pueblo di Aruba, ya cu ningun promesa y

siguransa cu a duna pueblo cu nan a haci, a wordo cumpli.

Un gobierno cu tin e curashi y puder di gaña henter un pueblo, simplemente ta un
gobierno cu no por goberna cu e berdad, cu no por goberna cu consenshi limpi y ta

sigui faya cu pueblo y hasta faya cu tanto gobierno di Reino y cu e comision di
supervision CFT.

Practicamente ta drentando ultimo siman prome cu Parlamento baha cu reces diabierna

venidero y ainda no tin indicacion cu nos lo trata presupuesto supletorio 2019 of otro
leynan cu gobierno tin cu pasa ainda cual leynan tin influencia riba e maneho financiero
pa 2020.

No solamente e aspecto ey pero Prome Minister a priminti Conseho di Minister di Reino
durante su bishita urgente na Den Haag recientemente, cu e lo pasa cierto leynan cu
mester habri caminda pa su gobierno cumpli exigencianan cu Hulanda pa pone pa su
gobierno.