Page 9 - KPA 17 DEC 2015

ORANJESTAD (AAN): Un accion relampago di Polis a conduci na basta detencion di
ilegalnan cu a yega tera via e area di Rodgers Beach.

Ademas a haya un auto para y den dje hende arma cu arma di candela. Polisnan cu a yega prome
eynan a pidi refuerzo mesora pasobra e ilegalnan tabata basta.

Mirando scarcedad di Polis na San Nicolas a pone cu Santa Cruz mester a sali mesora pa bai
duna un man tambe den Colony.

E boto a drenta via Colony y e hendenan mester a drenta awa pa asina nan por a yega tera. Nan
tur tabata muha. Probablemente ta hendenan cu a yega di bishita Aruba caba pero cu a wordo
deporta.

Durante henter e buskeda a topa cu un Toyota Corolla blanco A-31307 cu tabata den e area den
forma sospechoso. Probablemente nan a bin busca un of mas persona. Durante listramento den
auto a topa cu arma di candela y a bai over na detencion mesora di e tres hende local.

Tabata diamars anochi alrededor di 11:30 pm cu a drenta yamada di bisiñanan di Sero Colorado,
cu ta informa di movecionnan straño den e bario. Polis a mobilisa mesora pa e sitio y na altura di
JADS y e Kapel di Colony a topa cu un cantidad di hende muha ainda cu a declara cu nan a yega
cu boto y a landa bin tera.

E sospechosonan deteni ta J. Barrios-Villero, naci na Punto Fijo, Venezuela dia 29 di juni 1971;
J. G. Chirinos-Valles, naci na Coro, Venezuela dia 4 di april 1988; F.L. Sece-Millan, naci na
Piedra Plata, Venezuela dia 9 di september 1982; A.E. Rodriguez naci na Coro, Venezuela dia 17
di april 1985 y tambe su ruman E.J. Rodriguez naci na Coro, Venezuela dia 7 di juli 1982, La
Vela De Coro.

Separa di esunnan indocumenta, tambe Polisnan na e lugar a logra detene e localnan envolvi den
promove traficacion di hende. Esnan den e Toyota Corolla ta E.O. Gomez, naci na Republica
Dominicana pero cu nacionalidad Hulandes, di 33 aña di edad. A detene sospecha di ta anda den
“mensenhandel” y “vuurwapenverordening”. Tambe a detene R.E. Velasquez naci na Republica
Dominicana pero cu nacionalidad Hulandes di 28 aña di edad. Ta sospech’e di e delito
“mensenhandel” y di a faya na nos “vuurwapenverordering”. E di tres y ultimo local deteni ta R.
del C. Luque di nacionalidad Hulandes pero naci na Venezuela di 48 aña di edad. Ta sospech’e
di “mensenhandel”.