Page 26 - KPA_

Esaki ta un proyecto cu ta tuma luga den e ultimo periodo di nan estudio y cada grupo ta scoge su mesun
tema y e opcionnan ta hopi, incluyendo sushedad, zeta, garashinan ilegal y mas.
Un di e gruponan a scoge “turtuga” como nan enfoke y despues di a haci investigacion extenso riba esaki
a dicidi di trece e mensahe pa cu nan cuido y preservacion na e hobennan di Scol Primario Kudawecha. E
scol aki ta cay den e districto unda e studiantenan aki ta asigna, esta Noord.
Stephanie Solognier ta un di e studiantenan cu a organisa e lectura, hunto cu nan docente y e Polisnan di
bario cu kende nan ta trahando actualmente.
E studiantenan a cubri diferente aspecto manera cua ta e tipo di turtuganan cu ta pone nan webonan na
Aruba, kico mester haci ora mira un turtuga subi tera, kico e rol di e turtuganan ta den medio ambiente
en general y kico por haci pa mantene nan sigur y salvaguardia nan for di extension. A splica tambe
tocante CITES, un acuerdo internacional cu Aruba tambe ta uza como base pa proteccion di animalnan
den peliger di extension.
Tiki tiki e turtuganan ta experenciando retonan serio y si no protege nan, nan lo disparce, cual lo trece
problemanan serio pa e ecosistema, Stephanie Solognier a comenta. Entre otro e turtuganan ta hunga un
rol den mantencion di nivel di oxigeno den lama, y si nan no t’ey mas, hasta e color di santo lo cambia,
segun Solognier a splica.
E muchanan tabatin un intercambio entusiasma cu e grupo di Scol pa Polis y a haci hopi pregunta
interesante. Nan ta haya les di KDN cual ta cubri topiconan general y e interes t’ey den topiconan di
naturalesa, consecuentemente nan a haci pregunta “cu a pone nos pensa un rato tambe,” Solognier a
remarca despues di e presentacion.
E meta cu e lectura tabata pa yega mas cerca di comunidad y comparti informacion tocante un topico cu
mester tin e atencion di nos comunidad. Pa medio di e lectura informacion ta wordo pasa pa e generacion
cu tin cu tuma over den futuro y ademas, e muchanan ta bay cas y pasa e informacion pa nan mayornan,
nan welonan y amigonan. Traspaso di informacion corecto ta esencial y mescos cu esaki ta tuma luga
diariamente for di adulto pa e mucha, e proceso vice versa tambe ta hopi importante.
Solognier a urgi pa tur persona cu topa cu obhetonan di plastic den lama of riba beach pa piki esaki nan y
tira nan den bari. Sea e ta di bo of no, por fabor yuda mantene e medio ambiente liber di obhetonan cu ta
causa un impacto negativo riba medio ambiente. Por ehempel, den e caso di obhetonan di plastic, e
turtuga ta wak esaki como cuminda y ta come esaki, e obheto ta haci'e malo y consecuentemente ta causa
su morto.
Un otro punto di atencion cu Solognier y su grupo a trece dilanti tabata e coremento di auto of otro
vehiculo riba beach cu ta causa cu e santo ta “pak”. E consecuencia di esaki ta cu e turtuga driekiel cu
subi tera pa pone su webonan no ta logra coba su neishi den e santo cu ta gepak y e ta bolbe lama, laga e
webonan bay den lama y asina nan ta bay perdi.
E mensahe general cu e grupo aki tin pa comunidad ta pa por fabor no core cu vehiculonan riba beach,
no tira sushi riba beach ni den lama y en general yuda tene Aruba limpi y e medio ambiente sigur pa e
turtuganan y personanan cu ta biba y ta di bishita riba nos isla.