Page 12 - AM210913

12 AWEMainta .com Dialuna, 13 September 2021

Club Kibrahacha 60+ a celebra su di 36 aniversario cu

un identidad visual nobo y un reconocemento

Dia 9 di September ultimo, Club Kibrahacha a celebra su
36 aniversario hunto cu su miembro, boluntario y ademas
invitadonan. Club Kibrahacha a tuma e oportunidad aki
pa introduci su logo nobo y tambe duna reconicimento
na un boluntario cu a traha 35 aña na Club Kibrahacha.

Club Kibrahacha a introduci su logo nobo cu a wordo
revela pa publico dor di Promer Minister Evelyn Wever
Croes y Presidente di Hunta di Supervision di Club
Kibrahacha Berg Kamsteeg.

E logo nobo aki ta representa e vision nobo cu Club
Kibrahacha ta bayendo aden como centro di actividad
pa nos adulto mayor. E fundacion ta sigui inova y adapta
su servicio p’asina sigui sirbi nos adulto mayor den nos

comunidad. E logo nobo aki a wordo diseña dor di
Freeway Aruba.

E website nobo tambe a wordo inaugura pa Minister
di Integridad, Naturalesa, Transporte y Cuido di
grandinan, Ursell Arends. Riba e website por wak
informacion tocante tocante Club Kibrahacha y tambe

tur e actividadnan cu ta wordo ofrece n’e centro.

Durante e celebracion tambe a duna reconocimento na
sra. Irene Robles de Medina. Irene tabata un boluntario
pa 35 aña na Club Kibrahacha. Pa conmemora e momento
aki sra. Irene a ricibi e prome pin di Eric d’Arnault pa
tur su añanan di servicio n’e fundacion como boluntario
di obra di man.

Eric d’Arnault tambe tabata presente n’e evento aki. Na
aña 1983 Eric d’Arnault hunto monite di Aruba Rotary
a inicia cu e proyecto di Club Kibrahacha y dia 9 di
september 1985 Club Kibrahacha a habri su portanan
oficialmente pa actividadnan.

Awor Club Kibrahacha ta brinda nos adulto mayor un

variacion di actividad di movecion, arte, recreacion y
workshop. Actualmente tin algun workshop y actividad
cu ta tumando lugar p’asina mas persona por participa
n’e actividadnan cu tin. Pa cualkier pregunta, por tuma
contacto cu: Sr. Jeffrey Matos, cel. 594-6655.