Page 45 - AHATA

ORANJESTAD (AAN) – Prome Minister mr. Evelyn Wever-Croes, den conferencia di
prensa a expresa cu e ta sinti cu informacionnan ta wordo duna di manera incorecto, y
den e contexto di deficit y gastonan di personal, el a haya importante pa den e rueda
aki bolbe papia riba e tema.

E referi na e protocol cu a keda firma cu Hulanda y Gabinete Wever-Croes na aña 2018
unda a yega na cierto palabracion cu ya caba a wordo haci cu gobiernonan anterior,
pero cu nan no a tene nan mes na dje.

Un di e palabracionnan aki tabata e normanan nobo. Esaki ta implica cu e aña aki
Gobierno por cera cu un deficit di 25 miyon florin, pero pa otro aña e lo bira un surplus
di 25 miyon, y gobierno ta trahando riba esey. Asina e dignatario a señala. Gobieno no

a cera e gap completamente, pero e ta bayendo den bon direccion, Prome Minister a
subraya.

GASTONAN DI PERSONAL:

E mandatario a splica cu e otro palabracion tabata riba gastonan di personal. Tocante e
tema aki, Gobierno di Hulanda a purba di yega na palabracion den pasado caba cu otro
gobiernonan, pero no a logra esaki.

“Nos mes, den nos propio ‘Financieel Economische Memorandum’ den e relato cu nos a
publica casi un aña prome cu e protocol a wordo firma, nos a identifica gastonan di
personal como un problema serio pa e situacion financiero di gobierno.

“ Si nos no domina e gastonan di personal y no logra baha nan, nos no ta sali nunca for
di e problema financiero di pais Aruba”, Minister Presidente mr. Evelyn Wever-Croes a
subraya.

El a comenta cu ainda tin hende ta puntre di con e ta worry cu e problema financiero,
pasobra tur pais tin debe.

E dignatario a señala cu gobierno tin su vision y e kier bin cu su ideanan y plannan con
pa saca nos pais padilanti.