Page 27 - MIN ROBERT C
P. 27
2 AWEMainta Diahuebs, 21 September 2017
Pensionadonan a subi caya pa protesta
FOR di siman pasa, ora cu e sindicatonan cu tin representacion
den aparato publico a anuncia cu nan lo subi caya pa demanda
riba nan derecho, unda Gobierno lo debenan e suma di como 85
florin pa luna.
E promesa aki lo a ser haci dor di Prome Minister Mike Eman,
mientras cu anteriormente Gobierno a mustra cu e sindicatonan
aki no tin derecho di reclama, pasobra e pensionadonan aki no ta
den servicio di Gobierno mas.
Pesey ayera mainta, e pensioenadonan a dicidi di bay protesta
dilanti di Bustuurskantoor, unda nan a prepara un manifesto, cu
e Secretaria di Conseho di Minister, sra. Nicole Hoevertz a baha
buske. Nos ta bisa, cu e manifesto aki cu tur nan punto di deseo,
lo keda pa proximo Gobierno pa dicidi, pasobra despues di eleccion
aki, lo tin formacion di Gobierno y hopi di e actual Ministernan
lo tum’e mas rustig y sigur no kier negocia y menos ainda delibera
riba algo cu e sindicatonan sa cu nan no tin derecho riba dje.
Atendiendo e Congreso di UPAEP
Guillermo Raymond a sinti e temblor cu a azota Mexico
E Director di Post Aruba, Guillermo Raymond tabata na Mexico atendiendo
un Conferencia masha importante di Union Postal de las Americas, España y
Portugal (UPAEP), ora cu nan tur a keda sorprendi cu un temblor di 7.1 grado.
E conferencia aki a cuminsa dialuna ultimo y lo mester a finalisa diabierne
awor, pero debi n’e temblor e organisadornan a dicidi di cancela e conferencia
te un proximo oportunidad.
Inmediatamente e organisadornan a sa di saca tur delegado asina cu tabata
posibel pa nan por bolbe nan cas. Como tal e Director di Post Aruba, tambe
a tuma su avion y lo ta na Aruba caba, pero cu un experiencia cu sigur e no
kier ripiti.
T’asina cu cada 4 aña UPAEP ta organisa e conferencia aki, cu sigur ta uno
masha importante, pa sa mas di desaroyonan nobo cu tin p’e reto di Post.
Fuera di Guillermo Raymond, di Aruba, tabatin un delegacion di Post Corsou
tambe presente, kendenan tambe lo a bolbe Corsou caba.
