Page 10 - ATA

Durante e conferencia crucero di PAMAC, cual a tuma luga siman pasa, un total
di 83 miembro platinum di FCCA y 47 invitado internacional a participa.

E Platinum Associate Member Advisory Council Conference (PAMAC) di Florida-
Caribbean Cruise Association (FCCA) ta un evento cu Aruba Tourism Authority
ta wak como un oportunidad excelente pa ilustra e avancenan cu Aruba a
conoce.

Hunto cu socionan local, ATA a prepara un programa caminda e participantenan
di e conferencia a experiencia Aruba como destino turistico y por a nota cu e
participantenan a keda impresiona cu nos producto turistico.

Durante un anochi special riba Plaza Padu, FCCA a ricibi un otorgamento di parti
di ATA y APA. Por a nota presencia di 4 diferente Ministernan for di diferente isla
cu tabata presente na nos isla specialmente p’e conferencia di PAMAC.

ATA a pidi e artista conoci, Gilbert Senchi, pa traha un arte special cu a wordo
otorga na Florida-Caribbean Cruise Association. Esaki a wordo entrega como
aprecio p’e relacion cooperativo, p’e desaroya di e producto entre socionan
bilateral y pa e hecho cu conhuntamente nos ta nabega den futuro mantieniendo
fuerte nos mision pa crea un relacion di beneficio mutuo entre Aruba y e industria
di Turismo crucero.

E artista encarga a traha un replica di e anker publico mas grandi di nos isla,
(situa net na entrada di Colony) y a posiciona esaki riba un compas. Rib’e
compas a graba e posicion/coordinacion di Aruba for di Florida. Esaki a wordo
otorga na Michelle Paige, directora di Florida-Cribbean Cruise Association dor di
nos Gobernador Su Excelencia sr. Alfonso Boekhoudt y Ronella Tjin Asjoe-
Croes, CEO di ATA, den presencia di Jossy Figaroa, Director di Aruba Ports
Authority.