Page 52 - AVP

Pa basta dia, partido AVP cu den gobernacion nunca e duna cuenta y rason di
personanan cu e ta pone den su comisionnan y ta uza como abogado, ta lansa critica
contra Ministro Presidente Wever-Croes cu a laga oficina di su tata, abogado Hendrik
Croes, atende cu casonan di companianan di estado di Aruba.

Na hopi ocasion, a trata di tira acusacionnan den aire. Nunca e fraccion di AVP den
Parlamento di Aruba, a haci uzo di su poder pa yega na un investigacion di loke ta pasa
y atende cualkier accion robes, cu e armanan cu nan tin.

Un miembro di Parlamento por exigi tur informacion cu e kier di instancianan di
gobierno. e por haci uzo di asistencia di e autoridad mas halto riba tereno financiero di
Aruba, cu ta Algemene Rekenkamer Aruba, pa yega na berdadnan cu ta exigi accion na

nomber di pueblo.

Dialuna medionan di comunicacion a ricibi un informacion di AVP cu a entrega un keho
na Ministerio Publico contra Ministro Presidente cu segun informacionnan cu AVP a

presenta, lo ta haci su mes culpabel di actonan cu segun “AVP ta castigabel”.

E pruebanan lo ta consisti di 18 documento den cual por indica cu tata di e Ministro
Presidente, a traha pa gobierno y a wordo paga.

Na bos halto AVP a lansa acusacionnan den publico y mes anochi a reuni cu su conseho
di partido den un reunion “extra ordinario”.

Den edicion di ayera DIARIO tambe a publica cu e keho a wordo entrega y a keda en
espera di mas informacion di e fraccion di AVP den Parlamento.

Nos a keda en espera di informacion pakico AVP no a cana e caminda di nos cuadro

legal nacional pa medio di Parlamento pa a haci un investigacion profundo y hasta stop
loke ta tuma luga sin cu e lo por perhudica pueblo.

Conocedo di leynan di Aruba, di nos funcionamento estatal, nos ta puntra pakico no ta

fraccion di AVP, pero un fundacion di AVP cu no ta existi ainda, a entrega e keho na
Ministerio Publico.