Page 9 - FUND MUSEO ARKEOLOGICO 24 FEB 2016

Prome resultadonan di e investigacion riba e sitio arqueologico di Santa
Cruz 35
Tuesday, 23 February 2016 13:19
Comparti

Diahuebs dia 3 di Maart lo tin un presentacion sumamente interesante na Museo Arqueologico Nacional
Aruba (NAMA). Prof. dr. Corinne Hofman y prof. dr. Menno Hoogland di e proyecto ‘NEXUS 1492’ y drs.
Raymundo Dijkhoff, arqueologo, hefe di Departamento Cientifico di NAMA lo presenta hunto e prome
datonan conoci tocante e santana di Santa Cruz 35.

Desde e hayazgo di wesonan humano y otro material na 2001 e sitio aki a fascina tanto e academiconan cu
a cuminza investig’e, como e publico local. Na 2012 ora cu a ehecuta un excavacion di rescate a resulta cu
tin por lo menos 37 deramento na e sitio. NAMA como e instancia cu ta investiga, documenta, cuida y
promove nos herencia arqueologico, a dicidi e tempo ey di no excava henter e sitio, sino bai over na inicia
e proceso pa proteccion di e sitio segun normanan internacional. A informa publico pa medio di
conferencia di prensa y actividadnan publico tocante e importancia di e hayazgo aki y na 2014 a sera un
alianza strategico di investigacion, cu e proyecto financia pa Conseho Cientifico di Union Europeo esta
‘NEXUS 1492’.

Investigadornan di e red di NEXUS hunto cu nos profesionalnan local a continua cu estudio riba e
material di Santa Cruz 35 den 2015 y awor ta asina leu cu NAMA y NEXUS ta presenta e prome datonan
di e investigacion aki na publico. E prome datonan aki lo ta disponibel tambe den forma di un ‘folder’ cu
lo ta e prome edicion di un serie di publicacion nobo di NAMA. E prome edicion di e serie ta un
produccion di NAMA, NEXUS y ‘Fundacion 1403’ y lo ta disponibel proximamente tambe riba un
plataforma virtual.

E presentacion riba Diahuebs dia 3 di Maart lo ta na idioma ingles y ta cuminza pa 7’or y lo ta den
ambiente di un Café Cultural cu musica di jazz, pasaboca y sin falta algo pa fresca garganta. Entrada ta
gratis y un y tur ta bon bini.