Page 66 - MIN TTC 21 SEPT 2015

No por compara cifranan di Turismo cu no ta oficial ni
completo

Publication: Monday, 21 September 2015. Categoria: General

Parlamentario Jennifer Arends-Reyes

ORANJESTAD (AAN): Segun Sra Arends-Reyes por a tuma nota cu na varios ocasion miembro
di oposicion Sr. Oduber ta publicando cifra cu no a ni sali oficial di instancianan concerni y cu
no ta e cifranan completo tampoco. Ta di lamenta cu ta trece un bista eroneo y negativo ariba nos
pilar economico principal cu ta Turismo.

Locual tin di cifra oficial ‘released’ di e instancianan ta di luna di July pa motibo cu pa Augustus
dia cu Sr. Oduber di MEP a publica cifra ainda tabata falta algun dato pa procesa.

Den luna di July YTD ( year to date) Aruba a conose un aumento substancial di stop-overs of
turista cu ta yega Aruba, un aumento di 15.8% di 585,823 turista pa 678,404 den e prome siete
lunanan di 2015. Compara cu otro islanan di Caribe cu a conose un aumento entre 5 pa 10%, ta
nifica cu mas turista ta scohe Aruba. Pa compara luna cu esun di e aña anterior ta bon pero
mester wak e cu un bista mas amplio.

Turismo ta dinamico y ta varia di luna pa luna y por worde influencia pa varios factor manera
evento, mal tempo of cualkier otro factor. Un punto tambe cu Parlamentario Oduber tabata
preocupa ta e percentahe di ocupacion di camber di hotel cu a baha un luna cu algun percentahe.

AHATA a pronostica cu nan averahe di ocupacion di camber durante 2015 ta keda entre 76-78%
y hasta ta conose un aumento di 4% compara cu 2014. Tambe e ADR (Average Daily Room
rate) lo conose un aumento entre 5-10% den 2015 huntu cu e REVPAR den e mesun trend
tambe. AAA ( Aruba Airport Authority) tambe a anuncia cu lo tin 13% mas asiento disponibel
pa Summer 2015 (July 1 2015- October 31 2015) compara cu e mesun prome siete lunanan di
2014.

Turismo crucero ta pronostica cu lo por tin un disminuicion di 5-10% compara cu e aña anterior
pero asina mes ta un sector cu ta trahando sumamente duro ariba dj’e pa aña 2016 tin un mihor
aña pa e turismo crucero. Cu ampliacion di e terminal por spera barconan mas grandi tambe pa
Aruba. Awor dia cu tin mal tempo Aruba por perde 4000 pasahero den un solo biaha por
ehempel y ta factornan cu por pasa. Pa compara cu un bista mas amplio riba Turismo nos por uza
e factor di tourism receipts dus locual cu e turistanan ta contribui na nos economia tambe pa midi
con ta bayendo y e Tourism receipts ta creciendo cada aña kiermen sigur e factornan ta balansa
otro y locual ta e contribucion di Turismo na nos economia ta keda substancial.

http://www.diario.aw/2015/09/no-por-compara-cifranan-di-turismo-cu-no-ta-oficial-ni-completo/