Page 19 - Diario 18 Feb'15

DIARANZON 18 FEBRUARI 2015 DIARIO PAGINA 19

Rapport di IMF y
Evelyn Wever Croes

1Evelyn Wever Croes y MEP a dedica hopi tempo y energia

pa convence mundo cu Aruba ta den un situacion economico
malisimo y hasta nan a bay asina leu di traha un storia pa e
Hulandesnan cu tabatin e nomber cu Aruba tabata bay “feestend
ten onder”.

No tin un instancia cu mas autoridad ariba tereno economico
financiero cu Fondo Monetario Internacional, IMF, y e instancia
aki a enfatisa siman pasa cu Aruba su economia ta den tremendo
direccion. Un sla formal pa tur esnan den MEP cu cada rato ta
sclama cu Aruba su economia ta fatal y cu nos pais ta na rand
di un bancarota. E maneho cu e gobierno di ministro presidente
Mike Eman a hiba pa rescata nos economia tabata sumamente
exitoso y awo a haya elogio, reconocemento y apoyo di e Fondo
Monetario Internacional.

Esaki pa e gobierno di AVP ta hopi importante pasobra ora
e gobierno Hulandes kier a mete den e maneho di Aruba e
expertonan ariba tereno estatal unanimamente a duna Mike
Eman razon cu no tin base legal pa Hulanda exigi di gobierno
di Aruba cu nan mag mete den e maneho financiero di Aruba.
Awo IMF a confirma tambe cu e direccion cu gobierno di Aruba
a tuma door di no introduci e medidanan cu Hulanda tabata
exigi a duna un resultado positivo pa e desaroyo economico di
nos isla.

Un rapport di IMF cu ta asina positivo pa Aruba ta duna
tambe henter nos comunidad un sinti di satisfaccion cu Aruba
ta bayendo den bon rumbo ni cuanto e dirigentenan di MEP ta
purba di kibra esaki tur dia. E rapport valioso aki di IMF ta duna
nos gobernantenan tambe e satisfaccion cu nan conclusionnan
cua ta e miho direccion cu mester tuma como isla chikito den
un mundo di crisis ta haya reconocemento di e instituto di mas
valor ariba e tereno financiero economico. Atrobe nos ta mira
na Aruba tin un diferencia fundamental entre e AVP y MEP.

Un gobierno di MEP di ocho aña a percura pa nan famia y
amigonan cu mas no tabatin. Ora placa a caba cu nan no tabata
mustra ningun caminda na interes di pueblo unda placa a bay.
E contractonan cu famia y amigo a guli miyones di Florin di
nos pueblo. Awo cada Florin cu gobierno di AVP gasta ta worde
mira tur dia. Un Aruba creciendo y partiendo e atencion na tur
parti di nos isla. Nos comunidad ta sinti continuamente cu awo
tin un gobierno cu di berdad ta un gobierno di pueblo y hasta den
tempo dificil ta percura pa mehora bida di tur nos hendenan pero
sigur enfatisando e bienestar di esnan mas vulnerabel den nos
sociedad. Esaki ta e dolor grandi cu Evelyn Wever Croes mester
biba cune pasobra ni con nan purba di sconde nan maldadnan
cada biaha nan ta sali pa pueblo haya sa. Cu mentira tur ora nan
ta purba mancha nomber di hende drechi manera nos ministro
presidente Mike Eman y casi e mesun momento e berdad ta bin
afo y dal nan hopi duro. Awo atrobe! Tur nan mentiranan cu
Aruba ta bayendo pa cay den un abismo ta worde contradeci
door di e instituto cu mas autoridad y respet den mundo ariba e
tereno aki cu ta IMF. Ta kico Evelyn Wever Croes ta bay bisa
e Hulandesnan awo cu su storia di “feestend ten onder gaan”
a worde tira den bari di sushi door di IMF. No door di AVP of
e gobierno di AVP pero door di e organizacion di e nivel mas
eleva den mundo e storia maligno fabrica door di e mentenan
di MEP a worde descualifica por completo.