Page 55 - KPA JUNE 5,

Cuerpo Policial ta avisa comunidad cu desde awe ta duna un siman pa kita tur borchi cu tin poni sin
permiso di DIP riba caminda publico. E aviso aki ta conta pa e caminda grandi di Paradera te na Shahai
Bar and Restaurant na Santa Cruz, pero pronto lo expande e proyecto pa inclui henter Aruba.
E proyecto aki ta forma parti di tareanan pa medio ambiente cu Polisnan mester atende den cuadro di
nan estudio na Scol pa Polis. Wimbomar Krozendijk, un cu te encabesa e proyecto aki a splica cu tin 75
borchi den e area menciona y esaki ta solamente borchinan riba e caminda grandi. E grupo di trabao lo
expande nan area poco poco pa inclui henter Aruba pa asina logra kita “reklameborden” y otro
obhetonan for di caminda, pa cual e doñonan no tin un permiso di DIP. Cuerpo di Polis ta duna e
doñonan un siman pa kita e borchinan den forma boluntario. Si acaso no cumpli, lo bay over na kita e
borchinan y duna multa.
E borchinan ta forma peliger pa peatonnan, pero tambe pa usuarionan di caminda, como cu por bin un
biento fuerte cu ta move e borchi, cual por bay dal den hende of vehiculo. Wimbomar Krozendijk a añadi
cu por nota tambe cu tin borchinan cu ta stroba e bista di esun cu ta riba caminda y esaki ta forma un
peliger hopi grandi. DIP ta e instancia cu ta otorga permisonan pa pone borchi riba tereno publico y
DOW ta e instancia encarga pa controla encuanto cumplimento di reglanan pa borchinan riba tereno
priva. E dos instancianan aki ta asistiendo Cuerpo Policial den e proyecto aki, como cu esaki ta nan area
di trabao. Door cu a tolera e borchinan aki pa tanto tempo, e hendenan cu ta pone e borchinan no ta
consciente di e reglanan of ta ignora e reglanan, pero esaki ta bay cambia awo. Robert Maduro di D.I.P.
ta splica cu pa permiso pa borchinan cu ta menos di 1.5 meter di haltura por acudi cu un “situatieplan” na
DIP y haci peticion pa un permiso. E ta un procedura hopi simpel. Tur borchi riba 1.5 meter di haltura
mester di un bouwvergunning, cual tambe por pidi na DIP. E permisonan aki tin un costo y pa mas
informacion esunnan interesa por acudi na DIP.
E situacion cu e borchinan a bira caotico, pero cu e proyecto aki cu ta wordo inicia pa Polis ta haci un
comienso nobo y ta un bon momento pa haci hendenan mas consciente di e reglanan y permisonan
necesario, segun Robert Maduro di DIP a splica. E departamento di “Toezicht” di DOW tambe ta
participa na e proyecto aki, pero nan area ta mas bien borchinan riba tereno priva. Den e caso aki, cu ta
trata borchinan riba tereno publico, DOW ta contribui cu e proceso di transporta e borchinan cu wordo
kita. DOW pronto lo cuminsa controla tambe riba borchinan di propaganda riba terenonan priva, pa cual
tin reglanan pa cu e midinan, haltura, etc. DOW ta duna permiso pa e borchinan aki y lo avisa doñonan
di borchinan cu no ta cumpli cu e reglanan.