Page 3 - AHATA

2 LOCAL AWEMainta
Cuidou cu ‘Keith’:
Abusadonan ta activo den ‘Nightlife’ na Palm Beach
KEN ta ‘Keith’? No ta un nomber cu bo ta bay haya den e
seccion di crimen den corant, ni un hende cu a wordo lastra
den corte. Keith ta un personahe fictivo, pero e ta repre-
senta un tipo di abusador hopi real cu ta cana den e bida
nocturno di Aruba – specialmente den e area di Palm Beach.
‘Keith’ y su ‘brother’nan no ta parce criminal. Nan ta bin
di bon famia, hasta di ‘background’nan rico. Nunca nan a
falta nada, nunca nan a conoce dificultad. Y toch, eynan nan
ta, buscando e proximo victima. Nan wega no ta un simpel
coketeria of un pret inocente – e ta abuso.
Nan blanco? Damanan hoben, principalmente turista, pero
tambe localnan disfrutando di un anochi di ambiente. Nan
ta busca esunnan cu ta menos alerta, cu ta hari cu amigo,
of cu ta acepta un bebida gratis di un “tipo amabel.” Ta n’e
momento ey cu ‘Keith’ y su gang ta ataca.
E droganan cu nan ta uza
Loke ta haci ‘Keith’ peligroso no ta solamente su encanto of
su insistencia. T’e kimico cu e ta tira den bo glas.
• Rohypnol (Roofies): Un sedante asina fuerte cu e por
manda un hende for di tino por completo. Hopi biaha victi-
manan ta lanta sin corda kico a pasa, pero sabiendo cu algo
a pasa.
• GHB (Liquid Ecstasy): Sin sabor, sin holo, y ta actua rapido.
Un par di druppel por laga bo cu soño, paralisa, of inconsci-
ente.
• Ketamine (Special K): Un droga cu ta crea halucinacion y
parálisis. E victima por parce lanta pero ta incapaz di resisti.
• MDMA (Ecstasy / Molly): Ta crea confusion, hipersensibi-
lidad, y vulnerabilidad ora e wordo poni den un bebida na
scondi.
• Scopolamine (Devil’s Breath): Un di esunnan di mas
espantoso – ta laga e victima tur confundi, sumiso, y sin
ningun memoria di loke a sosode.
E substancianan aki ta invisibel den bo cocktail. Bo no ta
bay purba nan. Bo no ta bay hole nan. Pero nan por kita bo
control den cuestion di algun minuut.
Un patronchi scondi
Algun victima ta yega hospital, tur babuca, malo, y spanta.
Despues di bishita emergencia, nan ta haya remedi pa
contraresta e efectonan. Pero ata e parti mas espantoso:
Un dama local a comparti cu redaccion di AWEMainta cu ora
el a bay botica, e empleado a bis’e cu e tabat’e di 18 receta
p’e mesun remedi ey e fin di siman ey so. Esey no ta un coin-
cidencia – esey ta un patronchi. Y e ta demostra cu e abusa-
Diamars, 2 September 2025
dornan aki ta activo, frecuente, y operando abiertamente y
den bista di tur hende.
Un mensahe p’e damanan
Damanan, tene cuenta ken ta paga un drink pa boso na bar.
No tur bebida gratis ta bini sin un intencion scondi. Keda cu
bo glas cerca. No lag’e para su so, ni pa un seconde. Pone
un amigo tene un wowo, y si algo no ta sinti bon, confia bo
instinto y bay for di eynan.
Berguensa no mag di pone bo keda keto nunca. Si, haci
denuncia por sinti intimidante. Si, e abusadornan ta conta
riba bo silencio. Pero maske bo no kier papia, corda: Un dia,
un hende lo haci’e. Y ‘Keith’ y su gang lo wordo exponi.
Un mensahe p’e barnan
N’e club, bar, y loungenan di Palm Beach: Abusadornan
manera ‘Keith’ ta malo pa negoshi. Laga nan cana liber den
boso establecimento sin control ta haci boso complice. Si
algo pasa riba boso pista di baile, den boso luga, bou di
boso luznan – boso no lo scapa di responsabilidad. Ningun
turista no kier bolbe na un isla unda abusadornan ta opera
libremente. Proteha boso clientenan. Train boso personal.
Tene wowo riba ken ta drenta boso porta.
Un mensahe pa ‘Keith’ y su clan
Abo y bo amigonan ta kere cu boso ta intocabel. Boso ta
kere cu placa, encanto, y silencio lo proteha boso. Pero ata
e berdad: Por ta cu e damanan ta duda pa denuncia, pero un
solo bos lo ta suficiente pa expone boso. Y ora sosode, niun
cantidad di placa di famia of conexion lo por proteha boso.
Kisas abusadonan ta sconde den e sombra di Palm Beach,
pero luz semper ta haya nan.