Page 3 - AWEMAINTA

Diasabra, 4 Augustus 2018 AWEMainta 3

Peaton cu a caba di baha di bus alcansa pa auto

DIABIERNA pa mas o menos 8’or di mainta,
polis ta wordo manda cu hopi urgencia riba e
caminda pariba di e crusada di ex Rio Grande,
pa motibo cu un señora a wordo alcansa pa un
auto.
Na yegada enberdad nan ta topa cu e señora
gravemente herida cu golpinan serio na cabes,
e señora no tabata reaccionando, y mesora e
agentenan na e sitio a cuminsa pidi pa ambulance
cu hopi urgencia.
Na e sitio nan ta bin compronde cu e señora
lo a baha di un bus y a crusa pa bay pazuid di
caminda, net na momento cu e Toyota Tercel
Blauw, maneha pa un homber tabata biniendo
di pabou. Segun e chauffeur enberdad e tabata
bayendo pariba y no a mira niun hende crusa.
Personal di ambulance hopi lihe a prepara
e señora y a transporte cu hopi urgencia pa
hospital, e dama su situacion ta critico.
Por a mira cu door di e impacto e auto a lant’e
y el a dal den windshield banda robez (banda di
e chauffeur) pa despues cay riba caminda. Por a
constata tambe cu e tabata sangra profusamente
na su cabes.
Departamento Tecnico di polis, diferente
hefenan di polis di districto di Noord y tambe
Alto Comisario Hoo tabata na e sitio.
E Toyota Tercel Blauw a keda confisca pa mas
investigacion.
E accidente aki a sosode den oranan di mainta,
momento cu hopi hende ta moviendo riba caretera
direccion di nan trabou. Loke cu por constata
den trafico di Aruba ta cu automobilistanan
semper ta riba un velocidad halto y apesar cu
nan tin preferencia mester tene cuenta cu demas
trafico.