Page 92 - MIN VOS

Fundacionnan cientifico di partido AVP a entrega e rapport

preliminar di 1000voz na Mike Eman

Wednesday, 10 May 2017 18:30
Comparti

Diamars atardi lider di partido AVP Mikie Eman a haya e rapport preliminar di e evento exitoso 1000voz
cu a tuma lugar den fin di siman den Hilton Hotel cu participacion di centenares di hende. Miembronan
di fundacionnan dr.Mito Croes y Digna lacle-Herrera tabata presente na e momento special aki di
entrega di e rapport.

Lider di e partido innovativo AVP, Mike Eman despues di a tuma e rapport a haya un splicacion amplio
di Tyson Lopez, kende a repasa punto pa punto kico a wordo treci dilanti door di e participantenan. Kico

tabata e ponencia di cada topico - p.e. sostenibilidad of economia - y kico tabata e preocupacion y
deseonan. President di Fundacion dr. Mito Croes, sr. Philippe LaReine a bisa cu nunca e por a pensa cu
un idea cu a bin riba mesa djis algun luna pasa a resulta den un exito fenomenal asina. Awor mester bay
bek den nan seno y sigui traha riba e datonan cu a acumula pa yega na solucionnan pa loke a wordo trreci
dilanti. President di Fundacion Digna Lacle-Herrera sr. Rycond Santos Dos Nascimento tambe a expresa
su satisfaccion pa e gran trabou haci y su inmenso gratitud pa tur cu traha riba e evento cu a haya un
acogida grandisimo den pueblo. E ta contento cu e resultado, pero trabou no a caba aki. Ta awor e ta bay
cuminsa. Despues cada miembro di ambos fundacion a haya oportunidad pa conta di nan experiencia y a
sigui un discusion masha interesante entre nan hunto cu lider di partido Mike Eman. Otro siman e
rapport definitivo ta keda presenta na prensa y di eynan ta sigui traha den gruponan di enfoke pa hunto
yega na e miho resultado posibel. Tur hende tabatin si un opinion en comun: e exito a surpasa tur
expectativa.