Page 17 - HOH

ORANJESTAD (AAN) – Gele Koorts Muskieten Bestrijding (GKMB) siman pasa a traha
algun ora extra pa atende e yamadanan di keho cu e departamento a ricibi, tocante
molester cu sangura.

Asina Inspector Dionisio Richardson, a duna di conoce den entrevista cu DIARIO.

Richardson a splica cu pa GKMB atente tur e yamadanan aki den 8 ora di trabao no ta
bay. E hefe di departamento a dicidi di extende e oranan pa traha te mas laat, pa por

baha e cantidad di yamadanan y trece alivio door di haci control y spuit unda ta
necesario, aunke nan no ta pasa hacie cu truck den tur bario completo manera antes.

Richardson a expresa cu danki Dios e yobidanan a stop, maske cu nos mester di yobida

pa nos naturaleza, pero e index di molester di sangura a baha despues cu luna pasa
esaki a subi drasticamente. Esaki ta lamentable, sr. Richardson a indica, pasobra nan ta
spera cu comunidad coopera y haci nan parti y no depende di GKMB so.

Ora tin yobida ta forma plas di awa na diferente caminda, y comunidad mester keda
atento na esaki tambe. GKMB ta boga pa esaki y ta pidi pueblo regularmente, pero
asina mes tin negligencia aki aya. Tur hende ta druk, esey sr. Richardson ta compronde
pero nan mester di comunidad pa coopera. GKMB su so no por hacie.

El a menciona cu henter Aruba ta afecta. Ora nan atende e yamadanan y ta wak e
listanan diariamente. Ainda nan no a sali spuit cu e trucknan pero e sanguranan ta biba
pa un tempo y despues ta muri, y conforme e yobidanan baha e cantidad di sangura

tambe y e cantidad di webonan pa sigui broei.

E departamento aki a duna pueblo hopi informacion den bario splica nan kico nan por
haci pa evita e situacion di broeimento den nan cura di cas y/of rond di dje, pasobra si

un sangura pica hende den e bario e por haya e virus di dengue, chikungunya of zika,
manera hopi hende a haye den pasado. Hopi hende a pasa den dje a conta nan historia,
y cu nan a kere cu nan ta den nan final di bida y esaki mester pase over pa henter
comunidad. Esnan cu no a haye no sa kico e ta, sr. Richardson a subraya. El a bisa cu e

hendenan cu tin problema cu sangura por yama GKMB pa nan pasa y cana rond wak e
situacion.