Page 8 - KPA 3 NOV 2015

6 AWEMainta Diamars 03 November 2015

Por sinti un aliento di alivio den pueblo

Ora a bira conoci cu
Husticia a pone man
riba e atracadornan

Venezolano

SIGUR ta reina un alivio den pueblo, ora cu a bira conoci cu

Husticia Arubano a logra pone man riba e 3 atracadornan Vene-
zolano, cu un siman pasa a drenta y atraca Excelsior Casino. No
solamente a drenta horta, pero nan a maltrata hasta e damanan
cu tabata haci trabao den dicho casino. Anto awe, nan tabata
grita Polis, pa no dal nan.

For di momento cu a bira conoci cu e atraco a tuma lugar dialuna
siman pasa den Excelsoir Casino, e diferente dirigentenan di
Husticia Arubano a bin hunto, y asina a institui un team spe-
cial, dedica totalmente riba e caso, pa no duna chens alguno
p’e anti-socialnan huy.
For di prome dia, tabata sa cu aki ta trata di atracadornan no
local, pero mester ta stranhero.
Via di camara di seguridad, cu a graba nan bon ora nan a drenta
e casino, a duna Polis e bon pista.
Y maske cu awe tur elogio ta bay pa Polis, mester admiti cu ora
cu Husticia a dicidi di suministra e fotonan, cu esaki a yuda
tambe, ya cu tur hende den e pueblo aki a desea pa Polis pone
man riba nan.

Un decision bon sigur, tabata cu a sera tur frontera. ‎E chens pa
huy tabata limita, apesar cu tabatin informacion cu un of mas
lo a bay Venezuela caba, pero con?
Riba lama Guardacosta y Polis Maritimo a traha di dia y anochi,
unda nan a sa di controla tur boto.
Tabata diadomingo prome cu mey anochi, ora cu un di anti-
socialnan aki a bay busca informacion, a aserca un auto particu-
lar, cu sin cu nan sa, tabata di Polis, pa puntra pa un direccion.

E Polis ey, a sa di reconoce nan, pero no a actua, pero corecta-
mente a notifica e coleganan y asina a rondona e 3 individuonan
aki, y a bay over na nan detencion.
Di acuerdo cu nos informacion, for di dia di e atraco, nan tabata
keda den un cas na altura di Golfweg banda di De Vuyst, cu ta
di un choler.
No ta exclui cu proximamente mas hende lo keda deteni, ken-
denan sigur ta complice den sconde e anti-socialnan aki. Y den
nan, no ta exclui cu tin algun Arubiano.

Pa loke t’e placa, esey si no a ser haya, pero e Venezolanonan
mes a declara, cu nan ta dispuesto di colabora, contal nan no
ser maltrata pa Polis.
Tur 3 ta Venezolano y tur 3 ta di Maracaibo. Ta trata di Carlos
Jose Huerta Ibarra di 34 aña; Victor Manuel Valente Albornoz
di 24 aña, pero lo haci 25 aña diasabra awor, pero tras di trail.
E otro ta Julio Cesar Garcia Capdevilla di 26 aña.
Nan tur 3 lo wordo manda KIA te dia cu nan mester presenta
dilanti di Mesa Berde, sperando cu peso di castigo cay riba nan.