Page 6 - ARUBA BANK 8 MAART 2016

Reserva di divisa netto a subi Resumen di e Relato Mensual
di Januari 2016

Monday, 07 March 2016 16:29
Tweet
Comparti

Den e luna di Januari 2016, e cantidad di placa den circulacion a subi cu Afl. 65,0 miyon te na Afl.
3.861,2 miyon, compara cu e luna anterior, resultando for di un aumento den reserva di divisa netto di
Afl. 67,2 miyon y un bahada den activo domestico netto di Afl. 2,2 miyon. E subida den e reserva di divisa
netto ta debi na compra netto di divisa door di banconan comercial for di publico relaciona cu entrada
for di turismo, inversion directo y otro inversionnan.

E compra aki a wordo mitiga pa benta netto di divisa door di banconan comercial na publico asocia cu
importacion di mercancia, otro servicionan, e asina yama “financial derivatives” y transferencianan netto
di companianan local pa nan cuentanan den exterior. E bahada den e activo domestico netto a surgi door
di un bahada den credito domestico di Afl. 20,2 miyon, mientras cu transaccionnan no relata na credito a
subi cu Afl. 18,1 miyon. E ultimo aki a resulta principalmente door di subidanan den e asina yama
“shareholders’ equity”, “accounts receivable” y “premises and equipment” y bahada den otro debenan.
Credito domestico a baha door di menos credito bancario netto na e sector publico di Afl. 13,7 miyon y
den credito bancario na e sector priva di Afl. 6,5 miyon. E bahada den credito bancario netto na e sector
publico ta relaciona principalmente cu un subida den depositonan di gobierno di Afl. 18,5 miyon. E
bahada den credito na e sector priva a resulta for di menos credito na empresa di Afl. 7,8 miyon y credito
na consumidor di Afl. 3,0 miyon. Hipoteca pa vivienda, di otro banda, a expande cu Afl. 4,3 miyon.

Inflacion E nivel general di prijs, cu ta wordo midi door di e indice di prijs di consumo, a registra un
bahada di 0,9 porciento den e luna di Januari 2016, compara cu Januari 2015. E contribuyente principal
na e bahada aki ta e componente “Vivienda”, cual ta debi primordialmente na un bahada den prijs di
electricidad. Tambe e componente “Transporte” y “Cuminda y Bebida no-alcoholico” a contribui na e
bahada aki. Di otro banda, e componentenan “Recreacion y Cultura”, “Paña y Sapato”, y “Restaurant y
Hotel” a registra un aumento. Si exclui e componentenan di cuminda y energia for di e indice di prijs di
consumo, inflacion ta mustra un aumento di 0,8 porciento. Pa loke ta trata e promedio anual di e tasa di
inflacion, esaki a acelera cu 0,3 porciento na Januari 2016 compara cu 0,5 porciento na December 2015.

http://www.24ora.com/local-mainmenu-5/106086-reserva-di-divisa-netto-a-subi-resumen-di-e-relato-
mensual-di-januari-2016